कुकुडवाड : गटातील अतिमहत्त्वाच्या व राजकीय महत्त्व असणाऱ्या कुकुडवाड ग्रामपंचायतीमधील सरपंच, उपसरपंच निवडी शांततेत पार पडल्या. यात सरपंचपदी संजय आत्माराम जाधव यांची, तर उपसरपंचपदी डॉ. सचिन भिवा वाघमारे यांची दहाविरुद्ध तीन मतांनी निवड झाली.
नुकत्याच पार पडलेल्या निवडणुकीमध्ये आरक्षण पद्धतीवर हरकत घेतल्यामुळे जिल्ह्यातील सरपंच निवडी पुढे ढकलल्या होत्या. कुकुडवाड ग्रामपंचायतीमधील सरपंच निवडीसाठी दोन अर्ज दाखल झाल्यानंतर निवडणूक निर्णय अधिकाऱ्यांनी मतदानाची प्रक्रिया पार पाडली. ज्यामध्ये सत्ताधारी गटाचे संजय जाधव यांनी १० विरुद्ध ३ अशी बाजी मारली, तर उपसरपंचपदासाठीदेखील अर्ज दाखल होऊन लोकशाही पद्धतीने निवडणूक प्रक्रिया पार पडली. त्यामध्ये डॉ. सचिन वाघमारे यांनी १० विरुद्ध ३ अशी बाजी मारली.
सरपंच निवडप्रक्रियेत संगीता गायकवाड यांनी निवडणूक निर्णय अधिकारी म्हणून काम पाहिले, तर बी.बी. ढोक यांनी सहायक निवडणूक अधिकारी म्हणून काम पाहिले. ग्रामविकास अधिकारी एस.एस. काळे यांनी निवडणूक प्रक्रियेत सचिव म्हणून काम पाहिले. यावेळी कोणताही अनुचित प्रकार घडू नये म्हणून सहायक पोलीस निरीक्षक बाजीराव ढेकळे यांनी चोख बंदोबस्त ठेवला. या निवडीदरम्यान सर्व ग्रामपंचायत सदस्य उपस्थित होते.
दरम्यान, नवनियुक्त सरपंच, उपसरपंच यांचे माजी आयुक्त प्रभाकर देशमुख, मनोज पोळ, जिल्हा बँकेचे संचालक अनिल देसाई, पंचायत समिती सदस्य तानाजी काटकर, माजी उपसरपंच बाळासो जानकर व विक्रम काटकर तसेच विविध स्तरांतील मान्यवर व कुकुडवाड ग्रामस्थांनी कौतुक केले.