रेणुकादेवी नवरात्रोत्सवास प्रारंभ

चांदवड : भाविकांना दर्शन सुलभ होण्यासाठी सुविधा

चांदवड : येथील कुलस्वामिनी रेणुकामातेच्या नवरात्रोत्सवास प्रारंभ झाल्याची माहिती संस्थानचे व्यवस्थापक एम. के. पवार, सहायक व्यवस्थापक सुभाष पवार यांनी दिली. यावेळी घटस्थापना व महाआरती न्यायमूर्ती आर. बी. गिरी, न्यायमूर्ती एस. बी. तोडकर यांच्या हस्ते झाली. भाविकांची पहिल्याच दिवशी प्रचंड गर्दी होती. बुधवारी (दि. १४) राज्यमंत्री दादा भुसे यांच्या हस्ते महाआरती होणार आहे. मंदिरात होमहवन, दररोज पहाटे ५ वाजता महाभिषेक, पालखी मिरवणूक, रात्री महाआरती, विविध धार्मिक कार्यक्रमांचे आयोजन करण्यात आले आहे.यात्रोत्सव काळात विविध प्रकारची दुकानेही शिस्तबद्ध पद्धतीने थाटण्यात आल्याने परिसरात गर्दीवर नियंत्रण ठेवता येणार आहे. नवरात्रोत्सवानिमित्त मंदिरावर विद्युत रोषणाई करण्यात आली असून, यावर्षी ठिकठिकाणी क्लोज सर्किट सीसीटीव्ही कॅमेरे बसविण्यात आले आहेत. नवरात्रोत्सवासाठी सोमा टोलवे कंपनी, वीज वितरण कंपनी, आबड-लोढा महाविद्यालयाचे राष्ट्रीय सेवा योजनेचे स्वयंसेवक, ग्रामपंचायत, तहसील कार्यालय, उपजिल्हा रुग्णालय, उसवाड प्राथमिक आरोग्य केंद्राचे कर्मचारी, पोलीस स्टेशन, मेडिकल कॉलेज या संस्थांच्या वतीने स्वयंसेवक घटी बसणाऱ्यांना व भाविकांना मदत करीत आहेत. यात्रोत्सव काळात सुरक्षेच्या दृष्टीने पोलीस निरीक्षक श्रीहरी बहिरट, सहायक पोलीस निरीक्षक मधुकर वराडे यांच्या मार्गदर्शनाखाली पोलीस कर्मचारी, गृहरक्षक दल पुरुष, महिला कर्मचारी कार्यरत आहेत. नवरात्रोत्सव यशस्वीतेसाठी व्यवस्थापक एम. के. पवार यांच्या मार्गदर्शनाखाली सहायक व्यवस्थापक सुभाष पवार, तान्हाजी अहिरराव, पुरोहित प्रकाश वैद्य, हरेंद्र वैद्य, विजय जोशी, अमोल कुलकर्णी, नारायण कुमावत, खंडू अहेर, हरिभाऊ कासव, काळू पवार व किसन बल्लाळ, जगन्नाथ राऊत, संतोष देवरे, शेरू ब्रदर्स, दीपक कुमावत व चंद्रेश्वर भक्त मंडळाचे कार्यकर्ते प्रयत्नशील आहेत. (वार्ताहर)