पिंपोडे खुर्द सोसायटी ८९ व्या वर्षीही बिनविरोध

१९२६ पासून सहकारातील आदर्श काम करणाऱ्या या सोसायटीने सभासदांचा विश्वास सार्थ ठरविल्यानेच बिनविरोधचा हा इतिहास

वाठारस्टेशन : ‘विना सहकार नहीं उद्धार’ या सहकाराच्या ब्रीद वाक्याला साजेसे काम करीत कोरेगाव तालुक्यातील पिंपोडे खुर्द विविध कार्यकारी विकास सेवा सोसायटीने स्थापनेपासून म्हणजेच १९२६ पासून बिनविरोध निवडणूक करण्याचा इतिहास घडविला आहे. सलग ८९ व्यावर्षीही सोसायटीची निवडणूक बिनविरोध झाली आहे.२९ नोव्हेंबर रोजी या सोसायटीची निवडणूक होणार होती. एकूण १३ जागांसाठी २७ आॅक्टोबर हा अर्ज भरण्याचा शेवटचा दिवस होता. यावेळी १३ अर्ज दाखल करण्यात आल्याने ही निवडणूक बिनविरोध झाली. या निवडणुकीसाठी आमदार शशिकांत शिंदे व कोरेगाव तालुका कृषी उत्त्पन्न बाजार समितीचे सभापती अजय कदम यांनी प्रयत्न केले.२०१५-२०२० या कालावधीसाठी या सोसायटीची निवडणूक २९ नोव्हेंबर रोजी जाहीर झाली होती. यासाठी दि. २३ ते २७ आॅक्टोबर दरम्यान अर्ज भरणे तसेच दि. २८ रोजी अर्ज छाननी होणार होती. सोसायटीच्या एकूण १३ जागांसाठी गणपत शिंदे, सुभाष कदम, मधुकर कदम, धोंडिराम सावंत, अजय कदम, दिलीप यादव, पदमा कदम, मालती खामकर, सतीश बनकर, रामराव जाधव, योगेश कांबळे, प्रकाश कदम यांचे अर्ज कायमवैध ठरून या सर्वांची संचालक म्हणून निवड झाली.या निवडीबद्दल विधानपरिषदेचे सभापती रामराजे नाईक-निंबाळकर, आमदार शशिकांत शिंदे, लक्ष्मणराव पाटील, राष्ट्रवादी जिल्हाध्यक्ष सुनील माने, सुनील खत्री, शिवाजीराव महाडिक, संजय झंवर, किशोर बाचल, नीलेश जगदाळे, तानाजी गोळे, नाना भिलारे, नागेश जाधव, जालिंदर कदम, सचिव संजय पवार, किशोर कदम यांनी कौतुक कले. (वार्ताहर)१९२६ पासून सहकारातील आदर्श काम करणाऱ्या या सोसायटीने सभासदांचा विश्वास सार्थ ठरविल्यानेच बिनविरोधचा हा इतिहास कायम ठेवण्यात आम्हाला यश मिळाले. या सोसायटीसाठी लवकरच धान्य साठवणूक गोदाम, खत गोदाम निर्माण करण्यात येणार आहे.- अजय कदम, सभापती,कोरेगाव तालुका कृषी उत्पन्न बाजार समिती