लोकमत न्यूज नेटवर्क
सातारा : सातारा बाजार समितीत कांद्याच्या दरात वाढ होत असून, गुरूवारी क्विंटलला चार हजारांपर्यंत दर मिळाला. मागील अडीच महिन्यातील हा उच्चांकी भाव ठरला. तर भाजी मंडईत चांगला कांदा ५० रुपयांच्या पुढे गेला आहे. त्याचबरोबर कोबीला अजूनही कवडीमोल दर मिळत आहे.
सातारा बाजार समितीत जिल्ह्यातील विविध ठिकाणाहून शेतीमाल येतो. सातारा, जावळी, कोरेगाव, खटाव, माण, वाई, फलटण या तालुक्यातून भाजीपाला येत असतो. तसेच पुणे आणि सोलापूर जिल्ह्यातूनही काही प्रमाणात शेतीमाल येतो. दर गुरूवारी आणि रविवारी मालाची अधिक आवक होते.
तीन महिन्यांपूर्वी कांद्याचा क्विंटलचा दर साडेसहा हजारांपर्यंत पोहोचला होता. तर भाजी मंडई, दुकानात कांद्याची किरकोळ विक्री ७० ते ८० रुपये किलोने होत होती. पण, त्यानंतर कांद्याचा दर हळूहळू कमी झाला. मात्र, दीड महिन्यांपूर्वी केंद्र शासनाने कांदा निर्यातीवरील बंदी उठविण्याची घोषणा केल्यानंतर दरात थोडी सुधारणा झाली.
मागील काही दिवसात सातारा बाजार समितीत कांद्याला १ हजारापासून ३,८०० रुपयांपर्यंत क्विंटलला दर मिळत आहे. मात्र, या गुरूवारी ३२९ क्विंटलची आवक झाली तर ४ हजार रुपये क्विंटलपर्यंत दर गेला. एक नंबर कांद्याला ३ ते ४ आणि दोन नंबरच्या कांद्याला २ ते ३ हजारापर्यंत दर मिळाला. यामुळे शेतकऱ्यांमध्ये आनंदाचे वातावरण निर्माण झाले आहे.
सातारा बाजार समितीत गुरूवारी ५९ वाहनांतून ५६५ क्विंटल फळभाज्यांची आवक झाली. आवक चांगली असली तरी अजूनही अनेक भाज्यांना चांगला दर मिळत नाही. गवारचा दर तेजीत होता. गवारला १० किलोला ५०० ते ६०० रुपये दर मिळाला. तसेच शेवगा शेंगला ४०० ते ५०० रुपये भाव मिळाला. वांग्याला १० किलोला २०० ते २५० रुपये दर मिळाला. टोमॅटो ८० ते १००, कोबीला ३० ते ४० रुपये भाव मिळाला. टोमॅटो व कोबीला अजूनही कमीच दर मिळत आहे. तर फ्लॉवरला १० किलोला ६० ते १०० रुपये अन् दोडक्याला ३०० ते ३५० रुपये दर मिळाला.
बटाट्याला क्विंटलला ८०० पासून १,५०० रुपयांपर्यंत दर मिळाला. हिरव्या मिरचीला क्विंटलला ३ ते ४ हजार रुपये भाव मिळाला. आल्याला १ हजार ते १,८०० रुपये दर मिळाला. लसूणला क्विंटलला ३ ते ७ हजारांपर्यंत भाव मिळाला. वाटाणा अजूनही स्वस्त असून, २,५०० रुपयांपर्यंत क्विंटलला दर मिळाला.
चौकट :
पालेभाज्यांच्या दरात चढ-उतार
सातारा बाजार समितीत पालेभाज्यांची आवक चांगली होत आहे. पण, दरात सतत चढ-उतार सुरू आहे. गुरूवारी मेथीच्या १,६०० पेंडींची आवक झाली. मेथीला शेकडा ५०० ते ६०० रुपये दर मिळाला तर कोथिंबीरची १,२०० पेंडी आली. याला शेकडा दर अवघा ४०० ते ५०० रुपयांदरम्यान मिळाला. पालक पेंडीला शेकडा ३०० ते ४०० रुपये दर बाजार समितीत मिळाला.
......................................................