मायणी : मल्हारपेठ-पंढरपूर राज्य मार्गावरील मायणी-चितळी गावाच्या दरम्यान मायणीपासून तीन किलोमीटर अंतरावर बुधवारी सकाळी साडेआठच्या सुमारास अपघात झाला. यामध्ये सुरेश शिवाजी पवार (वय ३२) हे जागीच ठार झाले तर नामदेव शिवाजी जाधव (वय ५०) हे किरकोळ जखमी झाले. हे दोघेही (चितळी, ता. खटाव) येथील आहेत.
याबाबत मायणी पोलीस दूरक्षेत्र व घटनास्थळावरून मिळालेली अधिक माहिती की, मल्हारपेठ-पंढरपूर राज्य मार्गावर मायणी-चितळी दरम्यान मायणीपासून तीन किलोमीटर पश्चिमेस बुधवारी सकाळी साडेआठ वाजण्याच्या सुमारास दुचाकीवरून (एमएच ११ एजे ६७०७) दोघे वेगाने मायणीच्या दिशेला येत होते तर टमटम (एमएच ११ सीएच २६९८) हे चारचाकी वाहन मायणीकडून जयराम स्वामी वडगाव या ठिकाणी निघाले होते. यावेळी वेगामध्ये असलेली दुचाकीची टमटमला धडक बसला. यामध्ये दुचाकीवरील चितळी येथील सुरेश पवार हे जागीच ठार झाले तर नामदेव जाधव हे किरकोळ जखमी झाले. अपघाताची माहिती मिळताच पोलीस उपनिरीक्षक शहाजी गोसावी, पोलीस पाटील प्रशांत कोळी, सहायक पोलीस उपनिरीक्षक गुलाब दोलताडे, नानासाहेब कारंडे, बापूराव खांडेकर, नवनाथ शिरकुळे, योगेश सूर्यवंशी, प्रकाश कोळी, महेंद्र खाडे यांनी घटनास्थळी भेट देऊन अपघाताची नोंद व घटनास्थळाचा पंचनामा केला. जखमी नामदेव पवार यांना येथील प्राथमिक आरोग्य केंद्रामध्ये उपचारासाठी दाखल करण्यात आले तर सुरेश पवार यांचा मृतदेह कलेढोण येथे शवविच्छेदन करून नातेवाइकांच्या ताब्यात दिला.
१२मायणी अपघात
मायणी-चितळी मार्गावर झालेला अपघात. (छाया : संदीप कुंभार)