फलटण : सरडे, ता. फलटण येथे पत्नीला त्रास का देतो ? असे विचारीत दोघांना गंभीर जखमी करून जिवे मारण्याचा प्रयत्न केल्याप्रकरणी एकाजणास ग्रामीण पोलिसांनी अटक केली आहे.
तात्याबा विठ्ठल पाटील यांनी दिलेल्या फिर्यादीनुसार, रविवार, दि. २५ रोजी सायंकाळी सातच्या सुमारास सरडे, ता. फलटण हद्दीत त्यांच्या शेताचे लगत असणाऱ्या रस्त्यावर सुनील सदाशिव मोरे (रा. खामगाव, ता. फलटण) हा त्याचे चारचाकी गाडी क्रमांक (एमएच ११ बीव्ही ३६१७) मधून येऊन मुलगा चंद्रकांत यास ‘तू माझी पत्नी प्रज्ञा हिला त्रास का देतो,’ असे म्हणत गुप्तीसारख्या हत्याराने जिवे ठार मारण्याच्या उद्देशाने चंद्रकांत याचे पोटात गुप्ती मारून गंभीर दुखापत केली. दुसरा मुलगा सूर्यकांत हा भांडणे सोडविण्यास गेला असता त्याचेही डाव्या काखेत गुप्ती मारून गंभीर केले. त्या दोघांचा खून करण्याचा प्रयत्न केला आहे.
याप्रकरणी सुनील सदाशिव मोरे (रा. खामगाव, ता. फलटण) यांच्या विरोधात फलटण ग्रामीण पोलीस स्टेशनमध्ये गुन्हा दाखल करण्यात आला आहे. आरोपीला ताब्यात घेण्यात आले असून, पुढील तपास सहायक पोलीस निरीक्षक संजय बोंबले तपास करत आहेत.