पेट्री : सातारा शहराला पाणीपुरवठा करणाऱ्या कास तलावाच्या पाणीपातळीत दिवसेंदिवस घट होत असून, पाणी पातळी खालावू लागली आहे. सद्य स्थितीत तलावात अठरा फुटांपर्यंत पाणीसाठा शिल्लक आहे. गतवर्षी नोव्हेबरच्या पूर्व पंधरवड्यात कास तलावाच्या सांडव्यावरून पाणी वाहणे थांबले होते; परंतु यंदा ऑक्टोबर महिन्यात परतीच्या पावसाने कमी प्रमाणात हजेरी लावल्याने नोव्हेंबरच्या पहिल्याच आठवड्यात कास तलावाच्या सांडव्यावरून पाणी वाहणे थांबले आहे.
कास तलावात किनाऱ्यालगत पंचवीस फुटांपर्यंत पाणीसाठा होतो. गतवर्षी डिसेंबर महिन्याच्या अखेरीस एकोणीस फूट दोन इंच पाणीसाठा शिल्लक होता. यंदा आजमितीला सध्या ही पाणीपातळी अठरा फूट एक इंचावर आली आहे. यंदा परतीचा पाऊस ऑक्टोबर महिन्याच्या तिसऱ्या आठवड्यापासून कमी-कमी होत गेल्याने गतवर्षीपेक्षा यंदा एक फुटाने पाणीसाठा कमी शिल्लक आहे. सातारा शहराला होत असलेल्या पाणीपुरवठ्यामुळे दर दोन दिवसांला तलावातील पाणीपातळी एक ते दीड इंचाने कमी होत आहे. हा पाणीसाठा पावसाळ्यांपर्यंत टिकून रहावा, यासाठी पाण्याचा काटकसरीने वापर करणे आवश्यक आहे. एकूण तीन व्हॉल्व्हद्वारे पाणीपुरवठा केला जाणाऱ्या कास तलावातील पहिला व्हॉल्व्ह गतवर्षी जानेवारी महिन्यात उघडा पडला होता. सद्य स्थितीला तलावातील पाणीसाठा पाहता, जानेवारी महिन्यात तलावाचा पहिला व्हॉल्व्ह उघडा पडण्याची शक्यता वर्तविली जात आहे.
कोट..
सध्या कास तलावात अठरा फूट एक इंच पाणीसाठा शिल्लक आहे. यंदा परतीचा पाऊस कमी झाल्याने तलावात गतवर्षीपेक्षा एक फूट पाणीसाठा कमी आहे. यामुळे नागरिकांनी काटकसरीने पाण्याचा वापर करावा.
-जयराम कीर्दत, पाटकरी, कास तलाव
चौकट..
सर्वात खालच्या व्हॉल्व्हवर जाळी...
एकूण तीन व्हॉल्व्हद्वारे पाणीपुरवठा केला जाणाऱ्या कास तलावातील पहिला व्हॉल्व्ह गतवर्षी जानेवारी महिन्याच्या अखेरीस उघडा पडला होता. साधारण एप्रिल अखेरीस ते मे महिन्याच्या सुरुवातीस दुसरा व्हॉल्व्ह उघडा पडला जातो. दगड अथवा अन्य कोणतीही वस्तू अडकून पाणीपुरवठा खंडित होऊ नये, यासाठी कित्येक वर्षांपूर्वी पालिकेने सर्वात खालच्या व्हॉल्व्हवर जाळी बसविलेली आहे.
फोटो..
०१कास
सातारा शहराला पाणीपुरवठा करणाऱ्या कास तलावाच्या पाणीपातळीत दिवसेंदिवस घट होत असून, पाणी पातळी खालावू लागली आहे.