पोलीस तेथे तैनात असतानाही अस्ताव्यस्त रिक्षा लावल्या जात असून, त्यामुळे वाहतूक कोंडी निर्माण होत आहे. सध्या शहरातील चौक वडाप वाहनांनी घेरले असल्याचे दिसत आहे.
शहरातील कर्मवीर चौक, दत्त चौकासह भेदा चौकात काही रिक्षाचालकांकडून मुद्दामपणे रिक्षा आडव्या लावल्या जात आहेत. त्यासंदर्भात नागरिकांनी विचारणा केली, तर त्यांना उलट उत्तरे दिली जात आहेत. पालिका, पोलीस आणि आरटीओ यांनी संयुक्तपणे मोहीम राबवून बसस्थानक परिसरात बिघडलेल्या वाहतुकीला शिस्त लावण्यासाठी कारवाईचा दंडुका हाती घेणे गरजेचे आहे. बसस्थानकात दररोज हजारो प्रवासी ये-जा करतात. अनेकदा प्रवासी ये-जा करण्यासाठी रिक्षांचा वापर करतात. मात्र, स्वत:च्या वाहनाने, दुचाकीने बसस्थानकावर येणाऱ्या प्रवाशांची संख्याही मोठी आहे. अशा विविध मार्गांनी येणाऱ्या प्रवाशांना बसस्थानकात जाण्यासाठी दररोज अस्ताव्यस्तपणे उभ्या होणाऱ्या रिक्षांचा सामना करावा लागतो. त्याचबरोबर कर्मवीर भाऊराव पाटील, पुतळ्याच्या परिसरातील रिक्षा व्यावसायिकांचाही उद्योग अशाचप्रकारे चालला आहे.
मलकापूर परिसरात जाणाऱ्या रिक्षा तर त्यांचा थांबा सोडून रस्त्यावरच प्रवाशांना घेतात. त्याचबरोबर पुतळ्यासमोरच असलेल्या रिक्षा थांब्यावर अनेकदा रिक्षांच्या दोन-दोन रांगा केल्या जातात. तेथेच सिग्नलही असल्याने
या सर्व रिक्षांचा अन्य वाहनधारकांना नाहक त्रास सहन करावा लागत
आहे.
- चौकट
वाहतूक पोलिसांसमोरच मनमानी
वाहतूक पोलिसांसमोरच हा प्रकार घडत असताना त्यांच्याकडूनही काहीच उपाययोजना होत नसल्याने वाहनधारकांची मोठी गैरसोय होत आहे. त्यामुळे आता बसस्थानकाबाहेरील बिघडलेल्या रिक्षाचालकांना शिस्त लावण्यासाठी पालिका, पोलीस आणि आरटीओ यांनीच पुढाकार घेण्याची गरज आहे.
- चौकट
पादचारी मार्गालगत यांचीच सत्ता
कऱ्हाड शहरातील बसस्थानक परिसरातील पादचारी मार्गाला लागूनच हे वडाप व्यावसायिक आपली वडाप वाहने उभी करीत आहेत. मंगळवारी तर यांच्याकडून पादचारी मार्गावरच आपली वाहने उभी केली जात आहेत. त्यामुळे पादचाऱ्यांना रस्त्यावरून प्रवास करावा लागत आहे.
- चौकट
कॉलेजवाल्यांची वेगळीच तऱ्हा
बसस्थानकापासून विद्यानगरला (कॉलेज) जाणाऱ्या रिक्षा अलंकार हॉटेलसमोर उभ्या असतात. कर्मवीर चौकापासून ते विजय दिवस चौकापर्यंत रस्त्यातच उभे राहून हे रिक्षाचालक प्रवाशांसाठी आरडाओरडा करीत असतात. कधीकधी प्रवासी तुझा की माझा, यावरून त्यांच्यात हमरीतुमरीही होते. त्यामुळे त्याचा प्रवाशांना नाहक मनस्ताप सहन करावा लागतो.
फोटो : १५केआरडी०३
कॅप्शन : कऱ्हाडात बसस्थानकानजीक असलेल्या कर्मवीर चौकाला वडाप वाहनांसह रिक्षांनी घेरले असून, प्रवाशांना नाहक मनस्ताप सहन करावा लागत आहे.