कऱ्हाड : व्यक्तिमत्त्व विकासात शाळेतील संस्कारांचे स्थान अजोड असेच असते. व्यक्ती कितीही मोठी झाली, तरी तिला शाळेच्या ऋणात राहणेच आवडते. ‘देणाऱ्याने देत जावे, घेणाऱ्याने घेत जावे, घेता घेता एक दिवस देणाऱ्याचे हात घ्यावे’ या विचारांची सार्थकता शाळा ऋणातून काही अंशी उतराई होण्यातच असते, याचा प्रत्यय नुकताच आला. निमित्त होते, कऱ्हाडच्या लाहोटी कन्या प्रशालेत आयोजित ‘डिजिटल क्लासरूम प्रदान कार्यक्रमाचे!
कराडच्या लाहोटी कन्या प्रशालेतून १९७७ साली दहावी झालेल्या २५ विद्यार्थिनींनी ४४ वर्षांनंतर एकत्र येऊन स्वनिधीतून आपल्या शाळेला अद्ययावत डिजिटल क्लासरूम अर्पण करण्याचा सोहळा पार पडला. शिक्षण मंडळाचे अध्यक्ष बाळासाहेब कुलकर्णी यांच्या हस्ते हा कार्यक्रम झाला. कार्यक्रमाच्या अध्यक्षस्थानी शताब्दी समितीचे अध्यक्ष ॲड. सदानंद चिंगळे होते. शिक्षण मंडळाचे सहसचिव राजेंद्र लाटकर, कौन्सिल सदस्या अनघा परांडकर, प्रशालेच्या मुख्याध्यापिका शर्मिला बायस यांची यावेळी प्रमुख उपस्थिती होती.
बाळासाहेब कुलकर्णी म्हणाले, "शिक्षण मंडळाच्या शाळांतील माजी विद्यार्थी व त्यांचे कर्तृत्व हीच शिक्षण मंडळाची खरी संपत्ती आहे. बदलत्या वातावरणात अतिशय उपयुक्त अशी डिजिटल क्लासरूमची भेट संस्थेच्या शताब्दी वर्षात देऊन विद्यार्थिनींनी खऱ्या अर्थाने शताब्दी योग साधला असल्याचे सांगितले,
रंजना मळेकर यांनी शारदास्तवन केले. विद्यार्थिनींच्या वतीने प्रातिनिधिक स्वरूपात वर्षा ढापरे यांनी मनोगत व्यक्त केले. कमल कुंभार व शैला कुलकर्णी या शिक्षिका या कार्यक्रमास आवर्जून उपस्थित होत्या, तर त्यावेळच्या इतर शिक्षकांनी व्हिडीओच्या माध्यमातून विद्यार्थिनींशी संवाद साधला. या हृद्य प्रसंगाने विद्यार्थिनी भारावून गेल्या.
प्रत्येक वेळी आर्थिक मदतीची गरज असतेच असे नाही. आजी विद्यार्थी घडवण्यासाठी माजी विद्यार्थ्यांनी आपल्या कौशल्याची मदत देऊ करावी, असे आवाहन यानिमित्ताने करण्यात आले.
शाळामाऊलीची भेट झाल्याचा आनंद माहेरवाशिणींच्या चेहऱ्यांवर ओसंडून वाहत होता.
फोटो :