सातारा : म्युकरमायकोसिस संसर्ग असलेले रुग्ण सध्या जिल्ह्यामध्ये आढळत आहेत. वेळेत निदान व उपचार झाल्यास म्युकरमायकोसिस पूर्ण बरा होतो. या म्युकरमायकोसिसवर महात्मा ज्योतिराव फुले जन आरोग्य योजनेंतर्गत जिल्ह्यात सातारा येथील क्रांतीसिंह नाना पाटील सर्वसाधारण रुग्णालयाबरोबरच कऱ्हाड येथील सह्याद्री हॉस्पिटल व कृष्णा मेडिकल कॉलेज या रुग्णालयांमध्ये ही उपचार केले जाणार आहेत. अशी माहिती जिल्हा शल्य चिकित्सक डॉ. सुभाष चव्हाण यांनी दिली आहे.
या आजारासाठी वरील हॉस्पिटलसाठी नोडल अधिकारी म्हणून महात्मा ज्योतिराव फुले जन आरोग्य योजनेचे जिल्हा समन्वयक देविदास बागल यांची नियुक्ती करण्यात आली आहे. तरी ज्यांना म्युकरमायकोसिसची लक्षणे आढळल्यास त्यांनी तत्काळ आरोग्य विभागाशी संपर्क साधावा. या आजारावर महात्मा ज्योतिराव फुले जन आरोग्य योजनेतून उपचार केले जातात, असेही जिल्हा शल्य चिकित्सक डॉ. सुभाष चव्हाण यांनी कळविले आहे.
म्युकरमायकोसिस काय आहे : म्युकरमायकोसिस (काळी बुरशी/ब्लॅक फंगर्स) हा एक सामान्यतः दुर्मिळ असा बुरशीजन्य (फंगल इन्फेक्शन) आजार आहे. कोरोनाकाळात ह्या आजाराचे रुग्ण अचानक वाढल्यामुळे जनतेत भीतीचे वातावरण तयार झाले आहे. हा रोग प्रामुख्याने वैद्यकीय समस्या असणाऱ्या लोकांना प्रभावित करतो. त्यामुळे त्यांची रोगाविरुद्ध लढ्याची क्षमता कमी होते.
म्युकरमायकोसिस कशामुळे होतो : म्युकर नावाची बुरशी जमिनीत, खतांमध्ये सडणाऱ्या फळात व भाज्यात, तसेच हवेत आणि अगदी निरोगी व्यक्तींच्या नाकात आणि नाकाच्या स्त्रावात देखील आढळते. ज्या व्यक्तींमध्ये रोगप्रतिकारशक्ती कमी होते, जसे कर्करोगाचे रुग्ण, एचआयव्ही बाधा असलेले रुग्ण, ज्यांचे अवयव प्रत्यारोपण झाले आहे असे रुग्ण, अशांमध्येही म्युकरमायकोसिसची बाधा होण्याचे प्रमाण अधिक असू शकते. अधिकच्या माहितीसाठी १०४ या टोलफ्री क्रमांकावर संपर्क साधावा असे आवाहनही करण्यात आले आहे.
या रोगाचा अधिक धोका कोणाला आहे : ज्यांना स्टेरॉईड औषधे दिली जात आहेत आणि त्यामुळे त्यांची रोगप्रतिकारशक्ती कमी झाली आहे, ज्यांचा डायबिटीस अनियंत्रित आहे, ज्यांना कर्करोग आहे किंवा ज्यांचे नुकतेच अवयव प्रत्यारोपण झाले आहे, ज्यांना इम्यूनमोड्युलेटर्स अर्थात रोगप्रतिकारशक्तीत फेरफार करणारी औषधे दिली जात आहेत, जे प्रदीर्घ काळ आयसीयू म्हणजे अतिदक्षता कक्षात दाखल आहेत, ज्यांना प्रदीर्घ काळापासून ऑक्सिजन थेरपी दिली जात आहे व ज्यांना जुनाट किडनी (मूत्रपिंड) किंवा लिव्हर (यकृत) आजार आहे.
धोकादायक परिणाम टाळण्यासाठी या लक्षणांवर लक्ष ठेवा : डोळे दुखणे, डोळ्यांच्या बाजूला लाली येणे, नाक चोंदणे, सूज येणे, ताप येणे, डोके दुखणे, खोकला, दात हिरड्या दुखणे, दात ढिले होणे, श्वास घेण्यास त्रास, दम लागणे, रक्ताची उलटी होणे व मानसिक स्थितीवर परिणाम.
हे करा : रक्तातील साखरेची तपासणी, रक्तातील साखरेवर काटेकोरपणे नियंत्रण, कोविड-१९ नंतर रक्तातील साखरेची पातळी आणि मधुमेह यांचे निरीक्षण करा, स्टेरॉईडचा वापर डॉक्टरांच्या सल्ल्यानुसार करा, घरी ऑक्सिजन घेतला जात असल्यास स्वच्छ ह्युमिडीफायरमध्ये निर्जंतुक पाण्याचाच वापर करा व ॲंटिबायोटिक्स/ॲंटिफंगल औषधांचा वापर डॉक्टरच्या सल्ल्यानेच करा.
हे करु नका : आजाराची चिन्हे आणि लक्षणे याकडे दुर्लक्ष करु नका, बंद असणारे नाक हे बॅक्टेरिअल सायनुसायटिसमुळे असावे असा विचार करु नका. या आजाराची तपासणी करुन घेण्यास आग्रही रहा, दुर्लक्ष करु नका व म्युकरमायकोसिस या आजारावर त्वरित उपचार करा व वेळ घालवू नका.