खटाव : खटावमध्ये आंतरराष्ट्रीय परिचारिका दिवसाचे औचित्य साधून भारतीय मजदूर संघ, सातारा यांच्यावतीने आरोग्य विभागातील कर्मचाऱ्यांचा गौरव करण्यात आला.
विद्यमान आमदार महेश शिंदे याच्यावतीने आरोग्य कर्मचाऱ्यांना सॅनिटायझर, प्रमाणपत्र देऊन आमदार महेश शिंदे यांच्या पत्नी डॉ. प्रिया शिंदे यांच्याहस्ते गौरवण्यात आले.
कोरोनाचे नियम पाळून, योग्य ती खबरदारी घेऊन हा कार्यक्रम झाला. यावेळी सरपंच नंदकुमार वायदंडे, उपसरपंच अमर देशमुख, भारतीय मजदूर संघाचे खटाव तालुका प्रतिनिधी विशाल पवार यांची उपस्थिती होती.
परिचारिका दिनाचे महत्त्व आता या कोरोनाच्या कठीण प्रसंगात सर्वांनाच पटले आहे. कोरोनाशी लढा देताना आरोग्य कर्मचारी आपल्या जिवाची पर्वा न करता अविरतपणे काम करत आहेत. त्यांचे हात तर सेवेत आहेतच; परंतु त्यांच्या या कामाला प्रोत्साहन देण्यासाठी सर्वांनीच प्रयत्न करणे तितकेच महत्त्वाचे आहे. आंतरराष्ट्रीय परिचारिका दिनाच्यानिमित्ताने या आरोग्य कर्मचाऱ्यांच्या कामाचे कौतुक व्हावे, या उद्देशाने भारतीय मजदूर संघाच्यावतीने त्यांना ‘कोरोना योद्धा’चे प्रमाणपत्र देऊन गौरवण्यात आले.