लोकमत न्यूज नेटवर्क
सातारा : कोरोनामुळे उद्भवलेल्या परिस्थितीचा विचार करता यंदाचा गणेशोत्सव साध्या पद्धतीने व निर्बंधांचे पालन करून साजरा केला जाणार आहे. या उत्सवासाठी जिल्हा प्रशासनाने मार्गदर्शक सूचना जाहीर केल्या असून, यंदाही गणेश आगमन व विसर्जन मिरवणुकीवर बंदी घालण्यात आली आहे. तसेच सार्वजनिक मंडळांना मूर्तीच्या उंचीची मर्यादा चार फूट इतकी कायम ठेवण्यात आली आहे.
सार्वजनिक गणेशोत्सवासाठी मंडळांनी नगरपालिका व स्थानिक प्रशासनाची धोरणानुसार पूर्वपरवानगी घेणे आवश्यक आहे. तसेच मर्यादित स्वरुपाचे मंडप उभारण्यात यावेत. यावर्षीचा गणेशोत्सव साध्या पद्धतीने साजरा करणे अपेक्षित असल्याने घरगुती तसेच सार्वजनिक गणपतींची सजावट करताना त्यात भपकेबाजी नसावी. सार्वजनिक मंडळांसाठी गणेशमूर्तीच्या उंचीची मर्यादा ४ फूट व घरगुतीसाठी २ फूट इतकी निर्धारित करण्यात आली आहे. मूर्ती शाडूची, पर्यावरणपूरक असल्यास त्याचे विसर्जन शक्यतो घरच्या घरी करावे. विसर्जन घरी करणे शक्य नसल्यास नजिकच्या कृत्रीम तळ्यात विसर्जन करावे. उत्सवाकरिता वर्गणी स्वेच्छेने दिल्यास त्याचा स्वीकार करावा.
मंडळांनी सांस्कृतिक कार्यक्रमांऐवजी आरोग्यविषयक उपक्रम, शिबिर आयोजित करण्यास प्राधान्य द्यावे. त्याद्वारे कोरोना, मलेरिया, डेंग्यू आदी आजार आणि त्यांचे प्रतिबंधात्मक उपाय तसेच स्वच्छता याबाबत जनजागृती करावी. आरती, भजन, कीर्तन वा अन्य धार्मिक कार्यक्रम आयोजित करताना गर्दी होणार नाही, याची दक्षता घ्यावी. तसेच ध्वनी प्रदूषणासंदर्भातील नियमांचे व तरतुदींचे कोटेकोरपणे पालन करण्यात यावे.
(चौकट)
दर्शनाची ऑनलाईन सुविधा उपलब्ध करा
मंडळांनी श्रीगणेशाच्या दर्शनाची सुविधा ऑनलाईन, केबल नेटवर्क, वेबसाईटद्वारे उपलब्ध करुन देण्याची व्यवस्था करावी. मंडपामध्ये निर्जंतुकीकरणाची तसेच थर्मल स्क्रीनिंगची पर्याप्त व्यवस्था उपलब्ध करण्यात यावी. प्रत्यक्ष येऊन दर्शन घेऊ इच्छिणाऱ्या भविकांसाठी मास्क, सॅनिटायझर बंधनकारक राहील.
(चौकट)
विसर्जनासाठी कृत्रिम तळी...
गणेश आगमन व विसर्जन मिरवणुका काढण्यात येऊ नयेत. विसर्जनस्थळी होणारी आरती घरीच करुन विसर्जनस्थळी कमीत कमी वेळ थांबावे. नगरपालिका, विविध मंडळे, गृहनिर्माण संस्था, लोकप्रतिनिधी, स्वयंसेवी संस्था आदींच्या मदतीने गणेशमूर्तीं विसर्जनाकरिता कृत्रिम तळ्यांची निर्मिती करण्यात यावी, असे आवाहनही जिल्हा प्रशासनाने केले आहे.