पाटण : ‘पाटण तालुक्यात कोरोनाबाधित रुग्णांची गैरसोय होऊ नये, याकरिता कोरोना उपचार केंद्रामध्ये अतिरिक्त सुविधा निर्माण करण्यासाठी येत्या आठ दिवसांत आवश्यक निधी तातडीने उपलब्ध करून देणार असून, या सुविधा उपलब्ध करण्यात येणार आहे,’ अशी माहिती गृहराज्यमंत्री शंभूराज देसाई यांनी दिली आहे.
दौलतनगर, ता.पाटण येथे गृहराज्यमंत्री शंभूराज देसाईंच्या अध्यक्षतेखाली पाटण तालुक्यात वाढत्या कोरोना रुग्णांच्या संदर्भात तालुक्यातील तालुकास्तरीय सर्व अधिकाऱ्यांची आढावा बैठक झाली. याप्रसंगी त्यांनी वरीलप्रमाणे माहिती दिली. या बैठकीस उपविभागीय अधिकारी श्रीरंग तांबे, तहसीलदार योगेश टोंपे, अतिरिक्त उपविभागीय पोलीस अधिकारी डॉ.रणजीत पाटील, गटविकास अधिकारी मीना साळुंखे, तालुका वैद्यकीय अधिकारी डॉ.आर. बी. पाटील, वैद्यकीय अधिकारी डॉ.कुराडे, पोलीस निरीक्षक निंगाप्पा चौखंडे, उंब्रजचे सहायक पोलीस निरीक्षक अजय गोरड, कोयनानगरचे सहायक पोलीस निरीक्षक चंद्रकांत माळी, पाटण नगरपंचायतीचे मुख्याधिकारी अभिषेक परदेशी आदींची उपस्थिती होती. गृहराज्यमंत्री शंभूराज देसाई म्हणाले, ‘सातारा जिल्ह्यात दिवसेंदिवस कोरोना रुग्णांच्या संख्येत वाढ होऊ लागली आहे. सातारा जिल्ह्यात सरासरी प्रतिरोज २,४०० ते २,५००चे पुढे कोरोनाबाधित होत आहेत. पाटण तालुक्यात आज तारखेला ६७४ कोरोनाबाधित रुग्ण आहेत. त्यातील १२४ रुग्ण उपचार घेत आहेत. तर ५४० कोरोना रुग्णांना गृहविलगीकरण करण्यात आले आहे.
सगळीकडे रुग्णालयामध्ये बेडची क्षमता संपल्या आहेत. त्यामुळे कोरोनाबाधित रुग्णांना उपचाराकरिता ऑक्सिजन बेडची कमतरता भासू नये, याकरिता दौलतनगर कोरोना उपचार केंद्रामध्ये २५ व पाटण कोरोना उपचार केंद्रामध्ये ५० याप्रमाणे अतिरिक्त ऑक्सिजन बेड वाढविण्यात येणार आहेत.
पाटण तालुक्यात सुमारे २१५च्या वर ऑक्सिजन बेड उपलब्ध होतील.
(चौकट)
पाटणच्या केंद्रात व्हेंटिलेटरची सोय करणार
शंभूराज देसाई
आवश्यक असणाऱ्या ऑक्सिजन बेडची सोय आपण पाटण, दौलतनगर व ढेबेवाडी उपचार केंद्रामध्ये करीत आहोत. त्यामुळे ऑक्सिजनअभावी कोरोना रुग्णांची गैरसोय होणार नाही, परंतु ज्या रुग्णांना व्हेंटिलेटरची आवश्यकता आहे. त्यांना सातारा अथवा कऱ्हाड येथे व्हेंटिलेटर बेड उपलब्ध होत नाहीत, याकरिता पाटण कोरोना उपचार केंद्रात व्हेंटिलेटरची सोय करणार असल्याचेही शंभूराज देसाईंनी यावेळी सांगितले आहे.