लोकमत न्यूज नेटवर्क
सातारा : कोरोना लॉकडाऊनमुळे रिक्षाचालकांवर उपासमारीची वेळ आली. मुख्यमंत्री उद्धव ठाकरे यांनी अधिकृत रिक्षाचालकांच्या खात्यामध्ये प्रत्येकी दीड हजार रुपयांची मदत देण्याचे जाहीर केले होते. त्यानुसार रिक्षाचालकांना आर्थिक लाभ मिळू लागला. काही जणांच्या मात्र आज बँक खात्याला आधार लिंक नसल्याने अजूनही मदत मिळताना अडचणी येत आहे.
कोविड १९ च्या पार्श्‍वभूमीवर परवानाधारक रिक्षाचालकांना राज्य शासनाने सानुग्रह अनुदान म्हणून १५०० रुपये अर्थसाहाय्य देण्याबाबत घोषणा केली आहे. ही रक्कम संबंधित लाभार्थ्यांच्या बँक खात्यात ऑनलाइन पद्धतीने थेट जमा करण्यात येणार आहे. परवानाधारकांनी अनुदानाचा लाभ घेण्यासाठी परिवहन विभागाच्या संकेतस्थळावर ऑनलाईन पद्धतीने अर्ज सादर करावेत, असे आवाहन उपप्रादेशिक परिवहन अधिकारी विनोद चव्हाण यांनी केले आहे.
याबाबत अर्ज ऑनलाईन पद्धतीने सादर करताना परवानाधारकांनी अनुज्ञप्ती क्रमांक, वाहन क्रमांक आणि आधार क्रमांकाची माहिती भरणे आवश्यक आहे. एकूण ५७२९ इतके अधिकृत परवानाधारक रिक्षाचालक असून त्यापैकी ४ जूनअखेर १०३४ परवानाधारकांनी सादर केलेले अर्जाचा निपटारा करण्यात आलेला आहे.
योजनेचा लाभ घेण्यासाठी ऑटोरिक्षा परवानाधारकांनी आपले बँक खाते व मोबाईल क्रमांक आधारकार्ड क्रमांकाशी संलग्न असणे आवश्यक आहे. बहुतांश रिक्षाचालकांचे आधारकार्ड व मोबाईल क्रमांक संलग्न नसल्याने किंवा आधार क्रमांक बँक खात्याशी संलग्न नसल्याने ऑनलाईन अर्ज करण्यास अडचणी निर्माण होत आहेत.
कोट
पोस्ट खात्यामार्फत सातारा जिल्ह्यातील विविध पोस्ट कार्यालयांमध्ये एकूण ४८ ठिकाणी आधार संलग्न सुविधा उपलब्ध करून दिलेल्या आहेत. जिल्ह्यातील सर्व ऑटोरिक्षा परवानाधारकांनी कार्यालयास ऑनलाईन पद्धतीने लवकरात लवकर अर्ज सादर करावे, असे आवाहन करण्यात आले आहे.
विनोद चव्हाण,
उपप्रादेशिक परिवहन अधिकारी, सातारा
कोट..
बँक खात्याला आधारकार्ड लिंक असल्याशिवाय शासनाची मदत मिळू शकत नाही. माझे आधारकार्ड लिंक झाले आहे आता आठ दिवसांनंतर माझ्या खात्यात पैसे येतील, असे प्रशासनाने सांगितले आहे.
- सुनील प्रभाळे, रिक्षाचालक
आधारलिंक करण्यासाठी रांग
अनेक रिक्षाचालकांचे आधार हे बँक खात्याला जोडलेले नसल्याने त्यांना शासनाची मदत मिळू शकत नाही. आता मदत मिळेल या आशेने बँक खात्याला आधार लिंक करण्यासाठी लोक पोस्ट कार्यालय, आरटीओ ऑफिस या ठिकाणी रांगा लावत आहेत.