पिंपोडे बुद्रुक : सोळशी येथील शेतकरी महेश हिंदुराव शेलार (वय ५०) यांच्यावर लांडग्याने हल्ला केला. यामध्ये ते जखमी झाले आहेत.
वन विभागाकडून मिळालेल्या माहितीनुसार, सोळशी येथील शेतकरी महेश शेलार हे गावालगत असणाऱ्या आपल्या शेतजमिनीला पाणी देण्यासाठी शेतात गेले होते. मंगळवारी रात्री अडीचच्या दरम्यान लांडग्याने अचानक त्यांच्यावर प्राणघातक हल्ला केला. त्यावेळी ओरडण्याचा आवाज ऐकून शेजारील शेतकरी शेलार यांच्या मदतीला आरडाओरडा करत घटनास्थळी आला. त्यामुळे लांडग्याने तिथून पलायन केले. दैव बलवत्तर म्हणून जखमी झालेले शेलार लांडग्याच्या हल्ल्यातून सुदैवाने बचावले. जखमी शेलार यांना दोन्ही हाताच्या कोपरांजवळ तसेच उजव्या पायाच्या गुडघ्याखाली जखम झाली असून, शेजारील शेतकरी त्यांना तातडीने प्राथमिक उपचारासाठी ग्रामीण रुग्णालय पिंपोडे बुद्रुक येथील रुग्णालयात रात्रीच घेऊन गेले. डॉक्टरांनी त्यांच्यावर प्राथमिक उपचार केले व त्यांना घरी सोडण्यात आले. या घटनेची माहिती मिळताच कोरेगावचे वनक्षेत्रपाल राजू आटोळे यांच्या मार्गदर्शनाखाली वाठार स्टेशन येथील वन परिमंडल अधिकारी सी. एच. जगदाळे व रणदुल्लाबाद येथील वनपाल अश्विनी पवार यांनी जखमीस भेट दिली व घटनास्थळाची पाहणी केली तसेच शासन नियमाप्रमाणे जखमीला मदत मिळावी, यासाठी प्रयत्नशील राहू, अशी ग्वाही दिली.
सोळशी तसेच परिसरातील शेतकऱ्यांनी यापुढे रात्री-अपरात्री शेताला पाणी पाजण्यासाठी जात असाल तर स्वतःच्या संरक्षणासाठी सोबतीला माणूस व हातात बॅटरी व काठी असणे गरजेचे आहे, असे आवाहन वाठार स्टेशन वन विभागाचे परिमंडल अधिकारी जगदाळे यांनी शेतकऱ्यांना केले. यावेळी वन परिमंडळातील सर्व अधिकारी, कर्मचारी उपस्थित होते, तसेच हल्ल्यात जखमी झालेल्या शेतकऱ्याला औषधोपचारासाठी शासनाकडून मदत मिळावी, अशी अपेक्षा तमाम शेतकरी व ग्रामस्थांकडून होत आहे.
फोटो
०६महेश शेलार जखमी शेतकरी