लोकमत न्यूज नेटवर्क
सातारा : सातारा शहरातील आझादनगर गंगासागर कॉलनीमध्ये शाहूपुरी पोलिसांनी छापा टाकून दारूची चोरटी विक्री करणाऱ्यास ताब्यात घेतले. त्याच्याकडून ५,३०० रुपयांचा मुद्देमाल जप्त करण्यात आला आहे.
शाहूपुरी पोलीस ठाण्याचे पोलीस निरीक्षक संजय पतंगे यांना त्यांच्या खबऱ्यामार्फत माहिती मिळाली की सातारा शहरातील आझादनगर गंगासागर कॉलनीमध्ये एक व्यक्ती त्याच्या घराच्या आडोशाला देशी- विदेशी दारूच्या क्वाॅर्टरचा माल विक्री करत आहे. त्यानंतर त्यांनी पथकाला कारवाईच्या सूचना दिल्या.
पोलीस हेडकॉन्स्टेबल हसन तडवी, पोलीस नाईक सचिन माने यांनी अचानकपणे छापा टाकून सुभाष शंकर मुळे (वय ६१ रा. गंगासागर कॉलनी सातारा) यांना एका खाकी पुठ्ठ्याच्या बॉक्ससह ताब्यात घेतले. त्यांच्याकडील बॉक्सची तपासणी केली असता त्यांच्याकडून ५,३०० रुपये किंमतीच्या ४४ देशी विदेशी मद्याच्या बाटल्या जप्त करण्यात आल्या.