वेळे : शेंदुरजणे, वाई येथील मॅप्रो कोरोना रुग्णालयाचे लोकार्पण गृहराज्यमंत्री शंभूराज देसाई यांच्या हस्ते खासदार श्रीनिवास पाटील यांच्या प्रमुख उपस्थितीत पार पडले. हे हॉस्पिटल आमदार मकरंद पाटील यांच्या प्रयत्नातून उभारण्यात आले आहे.
या रुग्णालयात तीस ऑक्सिजन व सहा व्हेंटिलेटर बेड आहेत. एक्स रे मशीन, रॅपिड अँन्टिजन टेस्टची सुविधा, नऊ डॉक्टर, २५ कर्मचारी, वातानुकूलित शवपेटी या सुविधा येथे उपलब्ध आहेत. सुरुवातीला येथे ३६ रुग्णांवर उपचार सुरू होणार आहेत. नंतर यामध्ये वाढ करण्यात येईल. सरासरी ६० बेडपर्यंत संख्या वाढविण्यात येणार असल्याचे आमदार मकरंद पाटील यांनी सांगितले.
या इमारतीच्या तळमजल्यावर सध्या ही व्यवस्था करण्यात आली आहे. अजून दोन मजल्यांवर बेड व्यवस्था करण्यासाठी येथे पर्याप्त जागा उपलब्ध आहे. यामध्ये आणखी २५ ऑक्सिजन बेडचे काम सुरू आहे. हा प्रकल्प सुरू करण्यासाठी मागील १५ दिवस आमदार मकरंद पाटील सातत्याने प्रयत्नशील होते. प्रशासनाला सोबत घेऊन हे रुग्णालय उभारण्यासाठी अनेकांचे सहकार्य मिळाल्याचे आमदार पाटील यांनी सांगितले. याकामी मॅप्रो, गरवारे टेक्निकल फायबर लिमिटेड, वाई नगरपालिका व मांढरदेव देवस्थान ट्रस्ट, वाई मिशन हॉस्पिटल आदींचे सहकार्य लाभले आहे.
या वेळी अपर जिल्हाधिकारी रामचंद्र शिंदे, जिल्हा शल्य चिकित्सक डॉ. सुभाष चव्हाण, प्रांताधिकारी संगीता चौगुले-राजापूरकर, पोलीस उपअधीक्षक तानाजी बरडे, तहसीलदार रणजीत भोसले, गटविकास अधिकारी उदयकुमार कुसुरकर, डॉ. संदीप चव्हाण, नगराध्यक्षा डॉ. प्रतिभा शिंदे, उपनगराध्यक्ष अनिल सावंत, मुख्याधिकारी विद्या पोळ, सारंग पाटील, महादेव मस्कर आदी उपस्थित होते.