सातारा : हातावर पोट असणाऱ्या लोकांना कोरोना महामारीमुळे अनेक समस्यांना सामोरे जावे लागत आहे. पंचायत समितीजवळच्या रस्त्यावर टपऱ्यांमध्ये फळ विक्री करणाऱ्या विक्रेत्यांना टपऱ्यांना कुलूप लावून बसावे लागले आहे.
सातारा शहरात जागोजागी गाडे उभे करून फळांची विक्री करणाऱ्या विक्रेत्यांना पालिकेने पंचायत समिती आणि बांधकाम विभाग यांच्या मधल्या रस्त्यावर असणाऱ्या फुटपाथवर बसण्याची सक्ती केली आहे. मात्र, या ठिकाणी विक्री कमी होत असल्याने विक्रेत्यांची गैरसोय होत आहे.
आता गेल्या वर्षभरापासून कोरोना महामारीमुळे अनेकांना घरी बसावे लागले. गाठीशी जेवढा पैसा होता तोदेखील खर्च झाल्याने अनेकांच्या कडे भांडवल उरलेले नाही. भांडवल नसल्याने फळ विक्रीची दुकाने पुन्हा सुरू करता येत नाहीत. त्यामुळे विक्रेत्यांनी दुकाने बंद ठेवलेली आहेत.
दरम्यान, ज्यांची दुकाने सुरू आहेत, त्यांच्याकडे ग्राहक फिरकत नाहीत. त्यामुळे फळ विक्री होत नाही. ही फळे कालांतराने खराब होत असल्याने फळविक्रेत्यांचे हाल होत आहेत. सातारा शहरात रस्त्यावर कुठेही फळ विक्री करायची म्हटली तरी पालिका तसेच वाहतूक शाखा कारवाई करत असल्याने हे विक्रेते दिलेल्या जागेत ग्राहकांची वाट बघत बसलेले पाहायला मिळतात.
टपऱ्या बंद असल्या तरी पालिकेला पैसे द्यावेच लागतात. दिवसाकाठी पालिका तीस रुपये भाडे वसूल करते, यातून सुटका नाही. कोरोना महामारी संपत नाही तोपर्यंत व्यवसायाचे काही खरे नाही.
- लक्ष्मण निकम, फळ विक्रेता
फोटो ओळ : सातारा येथील पंचायत समितीजवळच्या रस्त्यावर असलेल्या फुटपाथवर या टपऱ्या ग्राहकाविना बंद ठेवण्यात येत आहेत. (छाया : सागर गुजर)