सातारा : सध्या लॉकडाऊन असूनही जिल्हाधिकार्‍यांच्या आदेशाला हरताळ फासत खणआळीतील काही कापड व्यावसायिकांनी दुकाने सुरू ठेवल्याचे पोलिसांना आढळून आले. याप्रकरणी पोलिसांनी एकता लेडीज वेअर, अप्सरा साडी सेंटर आणि पंकज क्रिएशन या दुकानांच्या मालकांवर कोविड-१९ अधिनियमानुसार गुन्हा दाखल केला आहे.
याबाबत अधिक माहिती अशी, शाहूपुरी पोलीस ठाण्याचे सहायक पोलीस निरीक्षक शितोळे व मोहन पवार, कुंभार, पांढरपट्टे हे रविवारी सकाळी सातारा शहरातून पेट्रोलिंग करत होते. यावेळी भवानीपेठ खणआळी येथे एकता लेडीज वेअर या नावाचे दुकान सुरू असल्याचे दिसले. हे दुकान शंकर वासुदेव लालवाणी (वय ५४, रा. प्रतापगंज पेठ सातारा) यांचे असल्याची माहिती मिळाली. तसेच दुकानात ग्राहक वसीम अन्वर मुल्ला (३३, रा. शनिवार पेठ, सातारा) व रुक्सार आझाद खान (२७, शनिवार पेठ, सातारा) उपस्थित होते.
तसेच सदाशिव पेठ सातारा येथील अप्सरा साडी सेंटर दुकान सुरू असल्याचे दिसले. दुकान मालक यांना त्यांचे नाव, गाव विचारले असता त्यांनी त्यांचे नाव पुरुषोत्तम लाहोटी (६०, रा. सदाशिव पेठ, सातारा) सांगितले. त्यांच्या दुकानातील गिर्‍हाईक पोलीस पाहताच पसार झाले.
त्यानंतर पोलिसांना पंकज क्रिएशन दुकान सुरू असल्याचे दिसून आले. पोलिसांनी दुकान मालकांना नाव, गाव विचारले असता त्यांनी पंकज हरिनाम लाहोटी (३०, शनिवार पेठ, सातारा) असे सांगितले. दुकानात दौलत गुलाब सय्यद (६०, रा. दुर्गापेठ सातारा), शशिकांत तुकाराम वाघमळे (५०, रा. कण्हेर, ता. सातारा), दीपाली पांडुरंग सावंत (३५, रा. पिंपोडे बुद्रुक, ता. कोरेगाव) हे ग्राहक म्हणून उपस्थित होते.
या सर्व दुकानमालकांनी पूर्वपरवानगी न घेता दुकाने चालू ठेवून जिल्हाधिकारी यांच्या आदेशाचे उल्लंघन केल्याप्रकरणी गुन्हा दाखल करण्यात आला आहे.