लोकमत न्यूज नेटवर्क
वरकुटे-मलवडी : हिंदू धर्मातील महिलांसाठी ज्येष्ठ महिन्यात येणाऱ्या पौर्णिमेला अनन्यसाधारण महत्त्व आहे. मात्र, कोरोनाच्या दुसऱ्या लाटेतील संक्रमणाने वटपौर्णिमेलाही ग्रहण लागल्याने, ऐन वटपौर्णिमेच्या दरम्यान वरकुटे-मलवडी पंचक्रोशीतील कोरोनाबाधित झालेल्या महिलांनी उपचार घेत असलेल्या संकल्प कोरोना सेंटरमध्येच वडाच्या वृक्षाची मनोभावे पूजा केली. स्वतः जीवघेण्या रोगाशी लढा देत असतानाही आपल्या पतीसाठी वरदान मागितले.
ज्येष्ठ महिन्यात येणाऱ्या वटपौर्णिमेच्या सणाला वड या वृक्षाच्या पूजेला अनन्यसाधारण महत्त्व आहे. वड हा वृक्ष दीर्घायुष्य असणारा, डेरेदार सावलीचा भक्कम वृक्ष म्हणून ओळखला जातो. वटपौर्णिमेच्या दिवशी उपवासाचे व्रत करून मनोभावे वडाच्या झाडाची पूजा केल्यावर धन्याला जास्त आयुष्य मिळते, अशी धारणा या मागे आहे. यंदा मात्र कोरोनाची काळी छाया वटपौर्णिमेच्या सणावर पडल्याने, कोरोनाने बाधित झालेल्या सुवासिनी महिला वटपौर्णिमेच्या पवित्र व्रतापासून आणि वटवृक्षाच्या पूजेविना वंचित राहू नयेत, यासाठी संकल्प कोरोना सेंटरच्या निखिल बनसोडे, रंजीत चव्हाण, ललित केंगार, कुंडलिक मंडले या स्वयंसेवकांनी आपलेपणाचा आधार देत, आईच्या मायेच्या उबेने कोरोना सेंंटरच्या प्रांगणातच वटवृक्षाची मोठी फांदी लावून उपचार घेत असलेल्या सर्व सुहासिनी महिलांंसाठी वटवृक्षाच्या पूजेचे आयोजन करून आपलेपणाचा आधार दिल्याने सर्वच स्तरांतून स्वयंसेवकांचे कौतुक होत आहे.
चौकट :
कर्मचाऱ्यांच्या नियोजनाने भारावल्या
कोरोनासारख्या जीवघेण्या आजारावर उपचार घेणाऱ्या महिलांना आपण आजारी असल्याने, आपल्याला वटपौर्णिमेच्या दिवशी वटवृक्षाची पूजाअर्चा करता येणार नाही, ही खंत त्यांच्या मनात राहू नये. सणाच्या निमित्ताने महिला रुग्णांचे समाधान व्हावे. यासाठी वटपौर्णिमा कोरोना सेंटरमध्येच साजरी करण्याचे नियोजन कर्मचाऱ्यांनी केल्याने सुवासिनी महिलांना खूप आनंद झाला.
फोटो २६वरकुटे-मलवडी
वरकुटेतील यशवंतराव चव्हाण हायस्कूलमध्ये सुरू असलेल्या संकल्प कोरोना सेंटरच्या प्रांगणात कोरोनाबाधित महिलांनी वटवृक्षाची पूजा केली.