विभागातील सर्वात मोठी बाजारपेठ म्हणून तळमावलेची ओळख आहे. शाळा, महाविद्यालये, पतसंस्था, बँका व सर्वात मोठी बाजारपेठ असल्याने विभागातील अनेक गावांतून शालेय विद्यार्थी, ग्राहकांची वर्दळ असते. दररोज येथील
बाजारपेठेत मोठी उत्पन्नवाढ होत असते; परंतु क-हाड-ढेबेवाडी मार्गावरील मुख्य बाजारपेठेत असलेल्या एसटी महामंडळाच्या पिकअप शेडची दुरवस्था झाली आहे. फरशा फुटलेल्या आहेत. खिडक्यांना दरवाजे नाही. शेडवरील पत्रा सडलेला आहे. पावसाळ्यात तर अक्षरश: सडलेल्या पत्र्यामुळे मोठ्या प्रमाणावर गळती होत असते. याठिकाणी उभे राहण्यास प्रवासी घाबरत आहेत. शेडचा कोणता भाग कधी कोसळेल, हे सांगता येत नाही. त्यामुळे जीवितहानी होऊ शकते. परिणामी, शेडचा आधार घेण्यास प्रवासी धजावत नाहीत. रस्त्यावर उभे राहून ते वाहनाची वाट पाहतात. मात्र, हा प्रकारही प्रवाशांच्या जीवावर बेतणारा आहे.