सातारा : जिल्ह्यातील वाढत्या कोरोना संसर्गाच्या पार्श्वभूमीवर जिल्ह्यातील उद्योगांनी सामाजिक दायित्व निधीचा विनियोग करून कोविड उपचारासाठी दवाखाना उभा करावा, यासंदर्भात खासदार उदयनराजे भोसले यांच्या पुढाकाराने जिल्हाधिकारी कार्यालयात बैठक झाली.
जिल्ह्यातील एसईझेड आणि डी झोनचा फायदा घेतलेल्या कंपन्यांची बॅलन्स शिट प्रभारी जिल्हाधिकारी रामचंद्र शिंदे यांनी मागवाव्यात तसेच कायद्याने अनिवार्य असलेल्या सामाजिक दायित्व निधी सीएसआरमधून सातारा जिल्हयातील नागरिकांसाठी कोविड़ उपचारासाठी दवाखाना उभा करावा, अशा सूचना प्रभारी जिल्हाधिकारी यांना केल्या.
त्या उदयोगांच्या बॅलन्स शिट पुढील बैठकीत बरोबर घेऊन, महाराष्ट्र राज्य औद्योगिक मंडळाचे अधिकारी, कंपनीचे प्रतिनिधी यांची संयुक्त बैठक लवकर घेण्यात यावी, अशा सूचना प्रभारी जिल्याधिकारी यांना केली.
तसेच कंपन्या हा खर्च करून स्थानिक नागरिकांवर उपकार करत नसून, ते त्यांना कायद्याने बंधनकारक आहे. जर या निधीमधून स्थानिक जनतेसाठी आरोग्य सेवा उपलब्ध करून दिली नाही, तर कंपन्यांनी शासकीय योजनांचा आतापर्यंत घेतलेला फायदा याचा हिशोब करून त्यासंदर्भात वेगळा विचार करावा लागेल, असा इशारा उदयनराजे भोसले यांनी बैठकीत दिला. यावेळी बैठकीला तालुक्यातील असंख्य नागरिक उपस्थित होते.