कोळकी : विडणी परिसरात तरसाचे दर्शन झाल्याने शेतकरी व नागरिकांमध्ये भीतीचे वातावरण निर्माण झाले आहे. येथील पवार वस्ती, जगताप वस्ती (आंब्याचा माळ) या परिसरात गेल्या पंधरा दिवसांपासून तरसाचा वावर वाढला आहे. येथील लोकांनी आपल्या शेतात कामाला जात असताना तरसाला पाहिले आहे तर येथीलच दोन जणांवर या तरसानीही हल्ला केला आहे. यामध्ये किरकोळ जखमी झाले आहेत. मात्र, या घटनेमुळे परिसरातील नागरिक व शेतकरी वर्ग तरसाच्या भीतीने घाबरून गेले आहेत.
विडणी गाव हे बागायती क्षेत्र असल्याने फलटण तालुक्यात सर्वात जास्त उसाचे क्षेत्र आहे. रात्रीच्या वेळी हिंस्त्र प्राणी बाहेर पडतात, कधी माणसांवरही हल्ला करू शकतात. विडणीतील पवारवस्ती व जगतापवस्ती परिसरातील उसाच्या पिकांमध्ये अनेक तरस दिसत आहेत. परिसरातील वातावरण भयभीत झाले असून, लोकांच्या जीवितास धोका निर्माण झाला आहे. याबाबत फलटण वनविभाग अधिकाऱ्यांशी संपर्क साधून या हिंस्त्र प्राण्यांचा त्वरित बंदोबस्त करावा, अशी मागणी नागरिकांमधून होत आहे.
दरम्यान, बुधवारी सकाळी पवारवस्ती येथे ठसे आढळून आले असून, हे ठसे तरसाची असल्याचे फलटण वनविभागाचे अधिकारी मारुती निकम यांनी सांगितले.
पॉईंटर करणे...
- जून महिन्यात शेतकऱ्यांची शेतातील कामाची लगबग सुरू असते; पण तरस या हिंस्त्र प्राण्याच्या दर्शनामुळे शेतात काम करायला मजूर यायला तयार नाहीत, यामुळे शेतकऱ्यांची शेतातील कामे खोळंबली आहेत.
-फलटण येथील वनविभागाचे अधिकारी राहुल निकम यांच्याशी संपर्क साधला असता घटनास्थळी भेट दिली असून, ठसे हे तरसाचे असल्याचे सांगून हा प्राणी रोजच ५० ते ६० किलोमीटर परिसरात भटकत असतो, तसेच मृत जनावरे खात असतो. माणसांवर हा प्राणी हल्ला करत नाही, दुर्मीळ एखादी घटना असेल माणसांवर हल्ला केलेली. त्यामुळे लोकांनी घाबरून जाऊ नये, असे आवाहन त्यांनी केले.
फोटो : पवारवस्ती येथील लोकवस्तीमध्ये तरसाचे ठसे आढळून आले आहेत.(छाया : सतीश कर्वे)