वाठार स्टेशन : निवडणुकीनंतर सरपंच आरक्षण, या निवडणूक आयोगाच्या आदेशाचे सुरुवातीला अनेकांनी स्वागत केले. मात्र आता निवडणूक झाल्यानंतर जाहीर झालेल्या सरपंच पदाच्या आरक्षणात अनेक गावांत सरपंच पदाचा उमेदवारच नसल्याने, या गावांना किमान महिनाभर तरी कारभारी मिळणार नाही. त्यामुळे सध्या तरी गैरसोयीचाच सामना करावा लागणार आहे.
राज्यभर नुकत्याच पार पडलेल्या ग्रामपंचायत निवडणूक निकालानंतर सर्वांचे लक्ष लागलेली सरपंच आरक्षण प्रक्रिया नुकतीच पार पडली. मात्र कोरेगाव तालुक्यातील सोळशी, तडवळे (सं) वाघोली, तळीये, काळोशी या गावांत सरपंचपद आरक्षण पडलेला उमेदवारच नसल्याने या गावाला गावकारभारी निवडण्यासाठी किमान अजून महिनाभर प्रतीक्षा करावी लागणार आहे. या गावासह अजूनही अनेक गावांत अशीच परिस्थिती निर्माण झाली असल्याने, निवडणुकीपूर्वीच सरपंच आरक्षण योग्य होतं, असे म्हणण्याची वेळ आली आहे. सरपंच आरक्षण ज्या कालावधीत जाहीर करण्यात आले, त्याचवेळी या गावातील सरपंच निवड कार्यक्रम होणार आहे. यावेळी संबंधित आरक्षण असलेला उमेदवारी अर्ज दाखल झाला नाही, तर हे पद रिक्त समजण्यात येऊन पुढील आदेश जिल्हाधिकारी देतील त्याप्रमाणे पुढील निर्णय घेण्यात येणार आहे, अशी माहिती कोरेगावचे निवडणूक निर्णय अधिकारी तहसीलदार अमोल कदम यांनी दिली.
नेहमीप्रमाणे सरपंच पदाचे आरक्षण हे निवडणुकीपूर्वी जाहीर व्हावे. त्यामुळे किमान ते आरक्षण असलेला उमेदवार निवडून आणणे सोयीचे होईल.
- अमोल आवळे
कोरेगाव-फलटण शिवसेना क्षेत्रप्रमुख
जिल्ह्यातील ग्रामपंचायत आरक्षण प्रक्रिया नुकतीच जाहीर केली आहे. त्यानुसार अनेक गावांत सरपंच पदाचा उमेदवार नसला तरीही काळजी करू नये. लवकरच अशा ग्रामपंचायत आरक्षणाबाबत नियमाप्रमाणे पुढील कार्यवाही करण्यात येईल.
- शेखर सिंह,
जिल्हाधिकारी, सातारा