६२ हजारांनी घेतला ६७ कोटींचा लाभ

विविध शिष्यवृत्त्या : सहायक समाजकल्याण आयुक्त उमेश घुले यांची माहिती

 सातारा : ‘राज्य शासनाच्या सामाजिक न्याय विभागामार्फत राबविण्यात येणार्‍या विविध शिष्यवृत्ती योजनेअंतर्गत जिल्ह्यात शिष्यवृत्ती, शिक्षण शुल्क, परीक्षा शुल्क सवलत, निर्वाह भत्ता, विद्यार्थ्यांसाठी गुणवत्ता पुरस्कार यासाठी २०१३-१४ या वर्षात ६७ कोटी ९३ लाख ७७ हजार खर्च केले असून, याचे लाभार्थी ६२ हजार ११८ इतके आहे,’ अशी माहिती समाज कल्याणचे सहायक आयुक्त उमेश घुले यांनी दिली. विशेष जिल्हा समाज कल्याण कार्यालयातील केंद्र शासन शिष्यवृत्ती विभागामार्फत सातारा जिल्ह्यात केंद्र शासन मॅट्रिकोत्तर शिष्यवृत्ती योजनेचा लाभ ४३ हजार ५ लाभार्थ्यांना देण्यात आला. यावर ५२ कोटी ४५ लाख ४६ हजार खर्च झाले आहेत. शिक्षण शुल्क व परीक्षा शुल्क सवलतीचा ५ हजार २७ विद्यार्थ्यांना लाभ देण्यात आला असून, या अंतर्गत १२ कोटी ८५ लाख ४० हजार खर्च झाले आहेत. केंद्र शासन मॅट्रिकोत्तर शिष्यवृत्ती व शिक्षण शुल्क, परीक्षा शुल्क सवलतीचा लाभ अनुसूचित जाती, विजाभज, इतर मागासवर्ग तसेच विशेष मागास प्रवर्गातील विद्यार्थ्यांना देण्यात आला आहे. सैनिक शाळा निर्वाह भत्त्याचा अनुसूचित जाती, अनुसूचित जमाती तसेच विजाभज आणि विशेष मागास प्रवर्गातील एकूण ८० लाभार्थ्यांना लाभ देण्यात आला आहे. यावर ४२ लाख ९२ हजार खर्च झाले आहेत. व्यावसायिक अभ्यासक्रमात शिकणार्‍या विद्यार्थ्यांना निर्वाहभत्ता योजनेअंतर्गत अनुसूचित जातीच्या ३७५ लाभार्थ्यांना २० लाख ४६ हजार तर विजाभज आणि विशेष मागास प्रवर्गातील ५०६ लाभार्थ्यांना २९ लाख ४६ हजार रकमेचा लाभ देण्यात आला आहे. पुस्तक पेढी योजनेचा अनुसूचित जातीच्या ८९९ लाभार्थ्यांना लाभ देण्यासाठी ७ लाख ४९ हजार खर्च झाले आहेत. केंद्र शासन शिष्यवृत्ती, शिक्षण शुल्क, परीक्षा शुल्क, सैनिक शाळा निर्वाहभत्ता, राजर्षी शाहू महाराज गुणवत्ता शिष्यवृत्ती व सावित्रीबाई फुले शिष्यवृत्ती या योजनांचे संगणकीकरण झाले असून, लाभार्थ्यांना थेट त्यांच्या खात्यावर रक्क्म जमा करून लाभ देण्यात येत असल्याची माहितीही घुले यांनी दिली. (प्रतिनिधी) विद्यार्थ्यांनी घेतला सर्वाधिक लाभ राजर्षी शाहू महाराज गुणवत्ता पुरस्कार योजनेत अनुसूचित जाती, विजाभज आणि विशेष मागास प्रवर्गातील १५१ लाभार्थ्यांना ७ लाख ८५ हजारांचे पुरस्कार देण्यात आले. राजर्षी शाहू महाराज गुणवत्ता शिष्यवृत्तीचा १७७१ लाभार्थ्यांना ५३ लाख २२ हजार खर्चून लाभ देण्यात आला आहे. औद्योगिक प्रशिक्षण केंद्रात शिकणार्‍या विद्यार्थ्यांना निर्वाहभत्ता योजनेअंतर्गत विजाभज प्रवर्गातील २१७ लाभार्थ्यांना ६४ हजारांचा लाभ देण्यात आला आहे. त्याचबरोबर सावित्रीबाई फुले शिष्यवृत्ती योजनेअंतर्गत इयत्ता ८ वी ते १० वीत शिकणार्‍या विजाभज प्रवर्गातील १० हजार ८७ विद्यार्थिंनीना १ कोटी ८७ हजार रक्कमेचा लाभ देण्यात आला आहे. विशेष जिल्हा समाज कल्याण कार्यालयातील केंद्र शासन शिष्यवृत्ती विभागामार्फत सातारा जिल्ह्यात विविध योजनांचा लाभ देण्यात आम्ही यशस्वी ठरलो आहे. २०१३-१४ मध्ये जवळपास आम्ही ६७.९३ कोेटी रुपये रक्कम लाभार्थ्यांना दिली आहे. - उमेश घुले, सहायक आयुक्त, समाज कल्याण