पेठनाका (ता. वाळवा) येथे राहुल महाडिक, रोहित पाटील यांच्याहस्ते युवराज कदम आणि चेतन मगर यांना निवडीचे पत्र देण्यात आले.
लोकमत न्यूज नेटवर्क
इस्लामपूर : भारतीय जनता युवा मोर्चा जिल्हा उपाध्यक्षपदी नरसिंहपूरचे युवराज कदम व भारतीय जनता युवा मोर्चा जिल्हा चिटणीसपदी नागावचे चेतन मगर यांची निवड करण्यात आली. युवा मोर्चाचे प्रदेश उपाध्यक्ष राहुल महाडिक यांच्या मार्गदर्शनाखाली पेठ नाका येथे जिल्हा कार्यकारिणी निवडी पार पडल्या. निवडीचे पत्र सांगली जिल्हा भारतीय जनता युवा मोर्चाचे जिल्हाध्यक्ष रोहित पाटील यांच्याहस्ते देण्यात आले.
राहुल महाडिक म्हणाले, इतर पक्षांपेक्षा भाजप या पक्षात कोणताही राजकीय वारसा नसताना मोठ्या पदावर काम करण्याची संधी मिळते. त्यामुळे तळागाळातील सर्वसामान्य युवा कार्यकर्त्यांना या विविध पदांच्या माध्यमातून मुख्य प्रवाहात आणून इस्लामपूर विधानसभा मतदारसंघात भाजपचे संघटन वाढवण्याचा आमचा मानस आहे. येणाऱ्या काळात मतदारसंघातील जास्तीत जास्त कार्यकर्त्यांना पक्षात काम करायची संधी देऊ.
रोहित पाटील म्हणाले, प्रदेश उपाध्यक्ष राहुल महाडिक यांच्या विचाराचे धडाडीचे कार्यकर्ते सांगली कार्यकारिणीत आलेले आहेत. त्यामुळे आम्हाला वाळवा व शिराळा तालुक्यात काम करण्यास अजून ताकद मिळेल.
युवराज कदम व चेतन मगर म्हणाले, महाडिक कुटुंबाने सर्वसामान्य कार्यकर्त्यांना नेहमीच संधी दिलेली आहे. राहुल महाडिक यांनी आमच्यावर दाखवलेला विश्वास सार्थ ठरवू. येणाऱ्या काळात इस्लामपूर विधानसभा मतदारसंघामध्ये भाजपची ताकद वाढवण्यासाठी आम्ही प्रयत्नशील राहु.
यावेळी पै. बबन शिंदे, शहाजी माने,युवराज कदम, हणमंत साळुंखे, संतोष कांबळे, मदन देसाई, संजय देसाई, विशाल कदम, नवनाथ साळुंखे, शशिकांत सुर्वे, स्वराज काटकर, गणेश मगर, किरण मगर, प्रशांत मगर, संपर्क प्रमुख अमोल पाटील व इस्लामपूर विधानसभा मतदारसंघातील युवक व इतर कार्यकर्ते उपस्थित होते.