दिघंची : आटपाडी तालुक्यातील उंबरगावनजीक दडसवाडी पाटी येथे बस व दुचाकी अपघातात एकजण ठार; तर एक जखमी झाला. विक्रम आप्पासाहेब गाढवे (२३. रा. दडसवाडी) असे मृताचे नाव आहे. ही घटना सोमवारी दुपारी अडीचच्या सुमारास घडली. मंगळवारी घटनेची नोंद पोलिसात झाली आहे.
दडसवाडी येथील विक्रम गाढवे हा संतोष भागवत गाढवे (वय २७) याच्यासोबत दिघंचीहून गावी निघाला होता. याेवळी चिपळूण - अक्कलकोट बस (एमएच १४ बीटी २७६०) पंढरपूरच्या दिशेने निघाली होती. दिघंचीपासून अवघ्या सहा किलोमीटर अंतरावर उंबरगाव - दडसवाडी पाटी येथे बसने दुचाकीला मागून जोराची धडक दिली. यावेळी विक्रम व संतोष हे दुचाकीसह जोरात रस्त्यावर पडले. यात विक्रमचा जागीच मृत्यू झाला. जखमी संतोष याला पंढरपूर येथील रुग्णालयात दाखल केले आहे. मृत विक्रम गाढवे याचा चुलत भाऊ नितीन गाढवे यांनी आटपाडी पोलीस ठाण्यात फिर्याद दिली आहे. अधिक तपास सहाय्यक पोलीस फौजदार तम्मा चोरुमले करीत आहेत.
फोटो-२२विक्रम गाढवे
फोटो-२२दिघंची०१