संख : अंकलगी (ता.जत) येथील युवकाने खलाटीतील वन विभागाच्या हद्दीत गळफास घेऊन आत्महत्या केली. भीमराव रामू चौगुले (वय २३, रा.चौगुले वस्ती, अंकलगी) असे मृताचे नाव आहे. सोमवारी सकाळी १० वाजता ही घटना उघडकीस आली. या घटनेची जत पोलीस ठाण्यात आत्महत्येची नोंद आहे.
भीमराव रामू चौगुले हा सोन्याळ अंकलगी रस्त्यावरील चौगुले वस्ती येथे आई व वडिलांसोबत राहत होता. त्याचा मोटार रिवायंडिंगचा व्यवसाय होता. रविवारी सकाळी सात वाजता कुलाळवाडी (ता.जत) येथून मोटार रिवायंडिंगची मोटार घेऊन येतो, असे सांगून तो घरातील दोन हजार रुपये घेऊन निघून गेला होता. दुपारपर्यंत घरी आला नाही. तो न आल्यामुळे घराच्यांनी शोध घेतला. त्याचा फोन कालपासून स्विच ऑफ होता.
आज सकाळी खलाटी येथील वन विभागाच्या हद्दीत झाडाला अनोळखी व्यक्तीने गळफास घेतल्याचे काही नागरिकांना आढळून आले. याबाबत संतोष आकाराम नाईक यांनी फोनवरून जत पोलिसांना माहिती दिली.
पोलिसांनी घटनास्थळी जाऊन पंचनामा केला. यावेळी मृतदेहाजवळ मोबाइल सापडला. मोबाइल बंद होता. मोबाइल सुरू करून एका नंबरला पोलिसांनी फोन केला; तेव्हा मृत तरुण भीमराव रामू चौगुले असल्याचे स्पष्ट झाले. दरम्यान, सोमवार सकाळी भीमराव चौगुले हा बेपत्ता असल्याची फिर्याद उमदी पोलीस ठाण्यात त्याच्या कुुटुंबीयांनी दिली होती. यावेळी त्याच्या आत्महत्येची माहिती कुटुंबीयांना समजली.
जत ग्रामीण रुग्णालयात शवविच्छेदन करून मृतदेह नातेवाइकांच्या ताब्यात देण्यात आला. अधिक तपास सहायक पोलीस फौजदार काका रुपनूर करीत आहेत.