फोटो-१५०४२०२१आयएसएलएम-चिंचोली न्यूज १ व २
चिंचोली (ता. शिराळा ) येथील बसस्थानकाजवळील तीव्र वळण आहे. हे तीव्र वळण कमी करण्याचे तसेच गटारीचे सुधारित काम सुरू करण्यात आले आहे.
विकास शहा
लोकमत न्यूज नेटवर्क
शिराळा : चिंचोली (ता. शिराळा ) येथील बसस्थानकाजवळील फरशी पुलाच्या भिंतीच्या आतून रस्त्यातूनच गटाराचे बांधकाम करण्याचा अजब प्रकार करून तीव्र वळणाची रुंदी कमी केली होती. याबाबत संबंधित ठेकेदार व अभियंत्याविरोधात आवाज उठविला होता. या प्रश्नाला ‘लोकमत’ने वाचा फोडली होती. हे तीव्र वळण कमी करण्याचे आणि गटारीचे सुधारित काम सुरू केले आहे.
सध्या या तीव्र वळणावरील फरशी पुलाच्या उत्तरेकडील बाजूने गटाराचे बांधकाम करत तीव्र वळण कमी करण्याचे काम सध्या केले जात आहे; परंतु दक्षिण दिशेला बांधण्यात असलेल्या गटाराचे काम नियमानुसार केले नसल्याचे दिसून येत आहे. सार्वजनिक बांधकाम विभागाच्या संबंधित अधिकाऱ्यांनी या कामाची चौकशी करून दोषींवर कडक कारवाई करावी, अशी संतप्त भावना ग्रामस्थांमधून व्यक्त होत आहे.
या तीव्र वळणावरील फरशी पुलाची रुंदी कमी असल्याने ग्रामस्थांमधून नाराजी व्यक्त केली होती, कारण यापूर्वी या ठिकाणी अनेक अपघात झाल्याने त्यात काहींचे प्राणही गेले होते. त्यातच रस्त्यातून गटाराचेही बांधकाम करून या ठेकेदाराने ग्रामस्थांच्या जखमेवर मीठ चोळण्याचा प्रकार केला.
कराड ते रत्नागिरी असा हा जवळचा मार्ग असल्याने येथून मोठ्या प्रमाणावर वाहतूक सुरू असते. त्यात आता या मार्गाचे रुंंदीकरण झाल्याने वाहतुकीत खूप मोठी वाढ होणार आहे.
चौकट
सामाजिक बांधीलकी
संवेदनशील चित्रकार, काष्ठशिल्पकार अशोक जाधव यांनी या फरशी पुलाला डबल नळे टाकण्यासाठी या आधीही संघर्ष केला होता. आता हे तीव्र वळण कमी करण्यासाठी खूप प्रयत्न करून या वळणाचे रुंंदीकरण करण्यास भाग पाडले. यासाठी त्यांना गावातील युवकांनी चांगली साथ दिली.