मिरज : वड्डी (ता. मिरज) येथील ओढ्यावरील बंधाऱ्याचे बांधकाम गावकऱ्यांनी बंद पडले. गावात ग्रामस्थ व ग्रामपंचायत असे दोन गट पडले आहेत. बांधकाम सुरू झाल्यास पाण्यात सामूहिक उड्या मारून आत्महत्या करण्याचा इशारा ग्रामस्थांनी दिला आहे.
मिरजेत कृष्णा नदीला मिळणाऱ्या वड्डीच्या ओढ्यावर बंधारा बांधण्याचे काम सुरू होते. महापुराच्या भीतीने वड्डीच्या ग्रामस्थांनी एकत्र येऊन बंधाऱ्याचे काम बंद पाडले आहे. २०१९ मध्ये आलेल्या कृष्णा नदीच्या महापुराने वड्डी गाव बाधित झाले होते. वड्डी ओढ्यालगत असलेल्या मागासवर्गीय वस्तीत पुराचे पाणी शिरले होते. त्याच्याशेजारी बंधारा बांधण्याचे काम सुरू आहे. या ५५ मीटरचा बंधाऱ्याच्या कामासाठी ४९ लाख रुपये मंजूर झाले आहेत. या बंधाऱ्याची ४७.७२ टी. सी. एम. पाणीसाठा क्षमता आहे. पूर आला तर वड्डी ओढ्यातील बंधाऱ्याच्या पाण्याचा साठा व कृष्णा नदीच्या पुराचे पाणी मिळून वड्डी गाव पुरात बुडेल ही भीती ग्रामस्थांच्या मनात निर्माण झाली आहे. गुरुवारी ग्रामस्थांनी एकत्र येऊन बंधाऱ्याचे बांधकाम बंद पडले. पंचायत समितीचे प्रभारी सभापती अनिल अमटवणे यांनी उपविभागीय जलसंधारण अधिकारी शिवाजी गोसावी व त्यांच्या अभियंत्यांना बोलावून घेतले होते. प्रत्यक्ष बंधाऱ्याच्या बांधकामाच्या ठिकाणी अधिकारी, ग्रामस्थ जमले होते. ग्रामस्थांना बंधारा नको तर बांधकाम बंद करा, असे म्हणत प्रभारी सभापती अनिल अमटवणे यांनी ग्रामस्थांची बाजू मांडली.
यावेळी बंधाऱ्यालगत उर्दू शाळा आहे. त्यालाही याचा फटका बसणार असल्याने शाळेतील मुले, पालक, ग्रामस्थ यांनी बंधारा नको असे फलक हातांत घेऊन घोषणा दिल्या. आता ग्रामस्थांनी टोकाची भूमिका घेतल्याने बांधकाम सुरू केल्यास पाण्यात सामूहिक उड्या मारून आत्महत्या करण्याचा इशारा दिला आहे. वड्डी सत्ताधारी ग्रामपंचायत गटाने बंधाऱ्याची मागणी केली होती. त्याला ग्रामस्थांनी एकत्र येऊन विरोध केला आहे. त्यामुळे गावात दोन गट पडले आहेत. सभापती अनिल अमटवणे यांनी वड्डीच्या गावकऱ्यांना पाठिंबा दिला आहे.