शिराळा
: देववाडी (ता. शिराळा) येथील धनाजी खोत याने अतिप्रसंग करून महिलेचा निघृण खून केला. नराधम धनाजी खाेत याला फाशीची शिक्षा झालीच पाहिजे, अतिजलद न्यायालयात हा खटला चालवा, यासाठी ॲड. उज्ज्वल निकम यांची नेमणूक करा, अशा मागण्या करीत देववाडी व परिसरातील गावांमधील हजारो ग्रामस्थांनी साेमवारी शिराळा तहसील कार्यालयावर मोर्चा काढला.
यावेळी महिला, विद्यार्थ्यांनी, नागरिक यांनी संतप्त प्रतिक्रिया व्यक्त केल्या. यावेळी प्रभारी सहाय्यक जिल्हाधिकारी आरोशी सिंग, तहसीलदार गणेश शिंदे यांना निवेदन देण्यात आले.
गुरुवार दि. २१ रोजी पीडित महिला शेती कामासाठी स्वतःच्या शेतामध्ये गेली असताना, निर्मनुष्य वस्तीचा गैरफायदा घेउन संशयीत धनाजी खोत याने अतिप्रसंग करून त्या महिलेची निघृण हत्या केली. या घटनेचे परिसरात संतप्त पडसाद उमटले. साेमवारी शिराळा येथील नाथमंदिर फाट्यावरून देववाडी येथील अबाल वृद्ध, महिला हजारोंच्या संख्येने तहसीलदार कार्यालयावर आले. यावेळी आमदार मानसिंगराव नाईक, माजी राज्यमंत्री शिवाजीराव नाईक, जिल्हा परिषद सदस्य संपतराव देशमुख, सुखदेव पाटील, सरपंच संजना वरेकर, दिव्या खोत, रेखा खोत, डॉ. उषाताई दसवंत यांनी ही घटना काळिमा फासणारी असल्याचे सांगत आराेपीस फाशीची शिक्षा देण्याची मागणी केली. यावेळी उपस्थित महिलांना अश्रू अनावर झाले हाेते.
यावेळी मृत महिलेच्या मुलांसह सरपंच संजना वरेकर यांनी तहसीलदार शिंदे यांना निवेदन दिले. निवेदनात म्हटले आहे की. पीडित कुटुंबीयांना आर्थिक मदत मिळावी किंवा त्यांच्या उपजीविकेची साधन व्यवस्था व्हावी, पीडित कुटुंबातील मुलांना शैक्षणिक सुविधा व शिष्यवृत्ती मिळावी, खटला न्यायालयात सादर करण्यासाठी लागणारी कागदपत्रे, पुरावे, साक्षीदार हे भक्कम असणे गरजेचे आहे. यामुळे संबंधितांना सखोल चौकशीचे आदेश वरिष्ठ स्तरावरून देण्यात यावेत आदी मागण्या करण्यात आल्या. यावेळी शिंदे म्हणाले. यांनी पीडित महिलेच्या कुटुंबास न्याय मिळण्यासाठी प्रशासनाकडून सर्व ती मदत करू.
यावेळी विराज नाईक, जिल्हा परिषद सदस्या अश्विनी नाईक, सम्राटसिंह नाईक, रणजितसिंह नाईक, महादेव कदम, रवी पाटील, नगरसेवक केदार नलवडे, संगीता साळुंखे, शिवाजीराव नांगरे, सचिन नांगरे, अमर खोत, अविनाश खोत, अमृता खोत, योगिता खोत, मीना बेंद्रे, राजेंद्र साळुंखे, राम पाटील यांच्यासह ग्रामस्थ उपस्थित होते.
फाेटाे : २५ शिराळा ७