लोकमत न्यूज नेटवर्क
वांगी : चिंचणी (ता. कडेगांव) येथे छोटा हत्ती व मोटारसायकलच्या भीषण अपघातात वांगीचे तरुण संतोष उत्तम गुजले (वय ३४) हा ठार झाला. शेखर नाथाजी मोहिते (३०) हा गंभीर जखमी आहे.
चिंचणी-वांगी पोलिसांकडून मिळालेली माहितीनुसार, शेखर मोहिते व संतोष गुजले हे कामानिमित्त सोनकीरे (ता. कडेगांव ) येथे गेले होते. काम आटपून ते दुचाकी गाडी (एम, एच, १० डि.जे. ८९६४) वरुन वांगीला परत येत होते. वाजेगांव (ता. कडेगाव) येथील प्रवीण चंद्रकांत पाटणकर हे छोटा हत्ती (एम. एच. १० ए. क्यु. ६६१७) या गाडीने चिंचणी-वांगी ग्रामीण रुग्णालयाजवळच रस्त्यावर मागे घेत होता. यावेळी मोटारसायकल व छोटा हत्तीची जोरदार धडक झाली. यामध्ये संतोष गुजले याच्या डोक्याला गंभीर इजा झाली होती. शेखर मोहिते हा बेशुद्ध अवस्थेत पडलेला होता.
घटनास्थळी असणाऱ्या ग्रामस्थांनी शासनाच्या १०८ या क्रमांकाच्या गाडीने उपचारासाठी कऱ्हाड येथे पाठविण्यात आली. मात्र, कऱ्हाड येथे उपचार मिळाले नसल्यामुळे नातेवाइकांनी दोघांना उपचारासाठी सातारा येथे दाखल केले. उपचारादरम्यान संतोष गुजले याचा मृत्यू झाला. गंभीर जखमी असणाऱ्या शेखर मोहिते याच्यावर सातारा येथील खासगी रुग्णालयात उपचार सुरू आहेत. संतोष गुजले वर रात्री उशिरा वांगी येथे अंत्यसंस्कार करण्यात आले.
सदर घटनेची फिर्याद सतीष उत्तम गुजले यांनी चिंचणी-वांगी पोलिसांत दिली आहे.