ढालगाव : ढालगाव (ता. कवठेमहांकाळ) येथील मोबाईल शॉपी व पान टपरी फोडून पाच मोबाईल, पान साहित्य व नऊ हजार रुपयांची रोकड असे एकूण चाळीस हजार रुपयांचे साहित्य चोरट्यांनी लंपास केले. ही घटना गुरुवारी रात्री घडली.
ढालगाव येथील बाजारपेठेत पांडुरंग चंद्रकांत दुधाळ यांची साई मोबाईल शॉपी आहे. गुरुवारी रात्री या दुकानाचे कुलूप कटावणीने तोडून चोरट्यांनी दुकानात प्रवेश केला व दुकानातील दहा हजार रुपये किमतीचे पाच मोबाईल व अडीच हजार रुपयांची रोकड लंपास केली. दुकानातील अन्य साहित्य विस्कटले आहे. या मोबाईल शॉपीच्या जवळच असलेल्या तानाजी आकाराम घोदे यांच्या विजय पान शॉपमधील दहा हजार रुपये किमतीची सिगारेटची वीस पाकिटे, पाच हजार रुपयांचे तंबाखूचे दहा पुडे, दोन हजार रुपयांचे बिडीचे पुडे व साडेसात हजार रुपयांची रोकड व अन्य साहित्य चोरट्यांनी हडप केले आहे.
सोबत फोटो : ढालगाव (ता. कवठेमहांकाळ) येथील चोरट्यांनी फोडलेले पांडुरंग दुधाळ यांचे मोबाईल दुकान.