शिराळा
: शिराळा येथे एका औषध दुकानातून चक्क दीड ते दोन लाखांची औषधे चोरून नेल्याची घटना घडली आहे. चोरट्यांनी औषधांसह सीसीटीव्हीचा डीव्हीआरही नेला आहे. ही घटना सोमवारी सकाळी उघडकीस आली असून शिराळा पोलीस ठाण्यात घटनेची नोंद झाली आहे.
येथील सोमवार पेठ येथे विद्युत कार्वेकर यांच्या मालकीचे कार्वेकर मेडिकल दुकान आहे. रविवारी रात्री काम संपल्यावर त्यांनी दुकान बंद केले. सोमवारी सकाळी ते दुकान उघडण्यासाठी आले असता दुकानाच्या दाराची कडी उचकटल्याचे दिसले. यावेळी त्यांनी दरवाजा उघडून दुकानात पाहिले असता औषधांचे मोकळे बॉक्स आढळून आले. याचबरोबर पैशाच्या ड्राॅवरमधून सुमारे तीन हजार रुपयांची रोख रक्कम व सीसीटीव्हीचा डीव्हीआर वायर तोडून चोरून नेला आहे.
या चोरीबाबत मुख्य बाजारपेठेतील विविध दुकानांचे सीसीटीव्ही फुटेज तपासणी सुरू आहे. सांगलीहून ठसेतज्ज्ञांना बोलविण्यात आले होते. श्वानपथकाद्वारेही चोरट्यांचा शोध घेण्यात आला. याबाबत गुन्हा नोंद करण्यात आला असून सहायक पोलीस निरीक्षक विशाल पाटील, सहाय्यक पोलीस उपनिरीक्षक कुमार वायदंडे हे तपास करीत आहेत.
चौकट
सातत्याने चोरीच्या घटना
यापूर्वी १३ जून २०२० रोजी कार्वेकर मेडिकलमध्ये चोरी करून ५ हजार रुपये चोरट्यांनी नेले होते. तसेच ४ डिसेंबर रोजी संदीप शेटे यांच्या मोबाईल दुकानातून २ लाख ४२ हजार रुपये किमतीचे २० ते २२ मोबाईल चोरट्यानी चोरून नेले होते. सध्या प्रत्येक व्यापाऱ्याने आपल्या दुकानापुरतेच सीसीटीव्ही कॅमेरे ठेवल्याने फुटेज तपासताना पोलिसांना अडचण येत आहे.
फोटो-०४शिराळा१