विटा : रस्त्यावर उभ्या असलेल्या उसाच्या ट्राॅलीला दुचाकीने पाठीमागून धडक दिल्याने दोघे ठार झाले. वीरेंद्र परशुरामजी वलथरे (सध्या रा. लेंगरे, ता. खानापूर, मूळ रा. हुलबीतुला, ता. सालेकसा, जि. गोंदिया) आणि राधेश्याम लोकचंद तुमसरे (सध्या रा. लेंगरे, ता. खानापूर, मूळ रा. रिसामा, ता. आमगाव, जि. गोंदिया), अशी त्यांची नावे आहेत. ही घटना सोमवारी रात्री साडेनऊच्या सुमारास जोंधळखिंडी (ता. खानापूर) येथे घडली.
वीरेंद्र वलथरे आणि राधेश्याम तुमसरे यांच्यासह गोंदिया जिल्ह्यातील काही युवक सध्या लेंगरे येथे मजुरीसाठी वास्तव्यास आहेत. सोमवारी सायंकाळी त्यांचा मित्र दिनेश वलथरे कऱ्हाड येथून लेंगरेला येणार होता. त्याला विट्यातून आणण्यासाठी रात्री साडेनऊच्या सुमारास वीरेंद्र आणि राधेश्याम दुचाकीने (क्र. एमएच ३५ एबी ६२६८) विट्याकडे निघाले होते. त्यावेळी जोंधळखिंडीजवळ रस्त्यावर अंधारात उसाची ट्राॅली उभी केली होती. या ट्राॅलीला रिफ्लेक्टर नसल्याने ती दुचाकीस्वारांच्या लक्षात आली नाही. तिच्यावर दुचाकी पाठीमागून धडकली. यात दोघेही गंभीर जखमी झाले. स्थानिक नागरिकांच्या मदतीने त्यांना तातडीने येथील ग्रामीण रुग्णालयात हलविण्यात आले. मात्र, तत्पूर्वीच वीरेंद्र यांचा मृत्यू झाला. राधेश्याम यांना सांगलीच्या शासकीय रुग्णालयात पाठविण्यात आले. मात्र, उपचार सुरू असताना मंगळवारी त्यांचाही मृत्यू झाला. या अपघातप्रकरणी ट्रॅक्टर चालक प्रकाश हरिबा कुलाळ (रा. खंडनाळ, ता. जत) याच्याविरुद्ध विटा पोलिसांत गुन्हा दाखल करण्यात आला आहे.