इस्लामपूर : शिरटे (ता. वाळवा) येथे घरजागेच्या कारणावरून एकाच भावकीतील दोन कुटुंबांमध्ये मारामारी झाली. यामध्ये दोन्ही बाजूंचे चौघे जखमी झाले. हा प्रकार गुरुवारी सकाळी नऊच्या सुमारास घडला. मारामारीत लोखंडी सळी आणि लोखंडी पाईपचा वापर करण्यात आला. या प्रकरणी पोलिसांत परस्परविरोधी फिर्यादी दाखल झाल्या आहेत.
या मारामारीत शंकर भीमराव सूर्यगंध, सीमा शंकर सूर्यगंध, दिग्विजय अशोक सूर्यगंध, शकुंतला अशोक सूर्यगंध असे चौघे जखमी झाले आहेत. शंकर सूर्यगंध यांनी दिलेल्या फिर्यादीत दोन्ही कुुटुंबांमध्ये घरजागेच्या कारणातून वाद आहे. त्या वादातून सकाळी नऊच्या सुमारास शकुंतला अशोक सूर्यगंध, विठ्ठल निवृत्ती सूर्यगंध, दिग्विजय अशोक सूर्यगंध या तिघांनी मिळून मारहाण केल्याचे म्हटले आहे. विठ्ठल सूर्यगंध याने लोखंडी सळीने शंकर सूर्यगंध यांच्या हातावर मारून त्यांना जखमी केले; तर इतरांनी त्यांची पत्नी सीमा यांना लाथाबुक्क्यांनी मारहाण करीत जिवे मारण्याची धमकी दिली.
दिग्विजय सूर्यगंध यांनी दिलेल्या फिर्यादीत शंकर सूर्यगंध, सीमा सूर्यगंध, सुयोग शंकर सूर्यगंध, सुमित शंकर सूर्यगंध या चौघांनी फिर्यादीसह त्याच्या आईला मारहाण केली. यामध्ये लोखंडी पाईपने दिग्विजय सूर्यगंध याच्या कपाळावर मारून त्याला जखमी केले; तर शकुंतला यांना लाथाबुक्क्यांनी मारहाण करण्यात आली.