अविनाश कोळी/लोकमत न्यूज नेटवर्क
सांगली : वीज पडून माणसे, जनावरे मृत्यूमुखी पडण्याच्या घटना दरवर्षी घडतात. या काळात काही प्रमाणात काही गोष्टींबाबत दक्षता घेतल्यास या आपत्तींपासून बचाव करता येऊ शकतो. सध्या आपल्या जीवनाचा अविभाज्य भाग बनलेल्या मोबाईलचा वीज कडाडताना होणारा वापर अधिक धोकादायक ठरू शकतो. त्यामुळे काही नियमांचे पालन आपल्याला करावे लागेल.
सांगली जिल्ह्यात दरवर्षी वीज पडून मनुष्यहानी व वित्तहानी होते. वीज पडून माणसांबरोबर जनावरांचेही मोठ्या प्रमाणावर मृत्यू होत असतात. काहींना अपंगत्व येते तर काही जखमी होतात. यावर्षीही जून महिन्यात जिल्ह्यात वीज पडून दोन व्यक्ती ठार तर सहा जनावरे मृत्यूमुखी पडली आहेत. अशाप्रकारच्या दुर्घटनांमध्ये शेतकरी, शेतमजुरांचा अधिक समावेश आहे. एका अहवालानुसार १९७९ ते २०११ या काळात प्रत्येक पावसाळ्यात वीज पडून ठार होण्याच्या दुर्घटना घडल्या आहेत.
चौकट
वीज पडत असताना ही घ्या काळजी
विजेचा प्रकाश आणि आवाज यात ३० सेकंद किंवा त्यापेक्षा कमी अंतर असेल तर तुम्हाला विजेपासून धोका आहे. अशावेळी तुमच्यावर वीज पडण्याची शक्यता ८० टक्के आहे. वीज तुमच्या आसपासच्या पाच किलोमीटर अंतरावर पडत आहे, अशावेळेस सुरक्षित जागेचा आसरा घ्या.
वीज चमकल्यानंतर मोबाईल बंद करावा. मोबाईल चार्जिंगला लावला असेल तर तो बंद करावा. चार्जरची पीन बाजूला करावी.
खुल्या मैदानात थांबू नये, कारण वीज सर्वात जास्त खुल्या मैदानात पडते.
झाडाखाली, उंच ठिकाणी उभे राहण्याचे टाळा.
विजेचा खांब, टेलिफोनचा खांब, टॉवर इत्यादीजवळही उभे राहणे टाळावे.
शेतात काम करत असाल तर जिथे आहात तिथेच राहावे. पायाखाली लाकूड, कोरडा पालापाचोळा ठेवा.
प्लग जोडलेली विद्युत उपकरणे हाताळू नका. दूरध्वनीचा वापर करू नका.
चौकट
अशी मिळेल नुकसानभरपाई
वीज पडून ४० ते ६० टक्के अपंगत्व आल्यास ५९ हजार.
१०० तर ६० टक्केपेक्षा अधिक अपंगत्व आल्यास दोन लाखांची मदत.
वीज पडून जखमी झालेल्या व्यक्तीला एका आठवड्यापेक्षा जादा काळ उपचारासाठी रुग्णालयात दाखल असल्यास १२ हजार ७०० रुपये.
एका आठवड्यापेक्षा कमी कालावधीसाठी ४ हजार ३०० रुपये इतकी मदत मिळणार आहे.