इस्लामपूर : भवानीनगर-बिचूद रस्त्यावर कराड शहरातून डंपिंग ट्रॉलीची चोरी करून संशयितरीत्या फिरणाऱ्या एकास इस्लामपूूर पोलिसांच्या गुन्हे प्रकटीकरण शाखेच्या पथकाने ताब्यात घेतले. त्याच्याकडून चोरीसाठी वापरला जाणारा ट्रॅक्टर आणि चोरलेली डंपिंग ट्रॉली असा ३ लाख ५० हजारांचा मुद्देमाल हस्तगत करण्यात आला.
अक्षय मच्छिंद्र कावरे (वय २२, रा. करवडी, ता. कराड) असे ताब्यात घेतलेल्या चोरट्याचे नाव आहे. पोलिसाचे पथक भवानीनगर, बिचूद परिसरात गस्त घालत असताना त्यांना कावरे याच्याविषयी माहिती मिळाली. पथकाने त्याला ताब्यात घेऊन चौकशी केली असता, त्याने दोन साथीदारांच्या मदतीने कराड शहर पोलीस ठाण्याच्या हद्दीत डंपिंग ट्रॉलीची चोरी केल्याचे कबूल केले. तसेच पथकाने त्याच्याकडून ट्रॅक्टर व ट्रॉली जप्त केली.
गुन्हे शाखेचे सहायक पोलीस निरीक्षक प्रवीण साळुंखे, हवालदार उत्तम माळी, गणेश मोहिते, सोमनाथ पाटील, गणेश शेळके, योगेश जाधव, उमेश शेटे यांनी या कारवाईत भाग घेतला.