शिराळा
: शिराळा तालुक्यातील झोळेवाडी येथे जखमी अवस्थेत सापडलेल्या गवानी जातीच्या घुबडाचे प्राण वाचविण्याचा प्रयत्न सुरू आहे. प्रहार संघटनेचे बंटी नांगरे-पाटील यांनी या जखमी घुबडास कोल्हापूर येथील पशुवैद्यकीय दवाखान्यात उपचारासाठी दाखल केले आहे.
वाकुर्डेजवळ असणाऱ्या झोळेवाडी येथील सूरज तालगावकर यांना सकाळी सहाच्या दरम्यान झुडपामध्ये मांजरे एका पक्ष्यावर हल्ला करत असल्याचे दिसले. यावेळी त्यांनी जवळ जाऊन पाहिले असता जखमी अवस्थेत घुबड झाडामध्ये पडले होते. यावेळी त्यांनी त्वरित शिराळा येथील प्रहार संघटनेचे बंटी-नांगरे यांना कळवले. बंटी नांगरे व प्रशांत शिंदे हे आठच्या दरम्यान घटनास्थळी पोहोचले. तोपर्यंत सूरज तालगावकर हे त्याठिकाणी थांबून मांजरांच्या हल्ल्यापासून रोखत होते.
घुबडाला जखमी अवस्थेत शिराळा वनविभाग येथे दाखल केले. मात्र वनक्षेत्रपाल सुशांत काळे यांनी घुबडाची प्रकृती चिंताजनक असल्याने पुढील उपचारासाठी कोल्हापूरला पाठवले.
कोल्हापूर येथील डॉ. संतोष वाळवेकर यांनी या घुबडावर प्राथमिक उपचार करून तपासणी केली असता उजव्या पंखाचे हाड मोडले असून त्याठिकाणी सेप्टिक झाले असलेचे आढळून आले. या गंभीर दुखापतीमुळे सध्या शस्त्रक्रिया करणे शक्य नाही. त्यामुळे त्याच्यावर उपचार करून त्याचे शरीर शस्त्रक्रिया करण्यायोग्य करणे आवश्यक आहे. त्यादृष्टीने उपचार सुरू करण्यात आले असल्याचे वैद्यकीय अधिकाऱ्यांनी सांगितले.
फोटो-२७ शिराळा२