आष्टा : आष्टा नगरपरिषदेच्या उपनगराध्यक्षा तेजश्री अनिल बोंडे यांनी आपल्या पदाचा राजीनामा नगराध्यक्षा स्नेहा माळी यांच्याकडे दिला. पुढील संधी शिंदे गटाला मिळणार असल्याने या गटाचे शेरनवाब देवळे, धैर्यशील शिंदे व प्रतिभा पेटारे यांच्या नावांची चर्चा आहे.
आष्टा पालिकेच्या उपनगराध्यक्ष पदाची संधी जलसंपदामंत्री जयंत पाटील गटाला दुसऱ्या व चौथ्या वर्षी देण्यात येते. चौथ्यावर्षी मनीषा जाधव यांच्यानंतर तेजश्री बोंडे यांना संधी देण्यात आली. त्यांचा कार्यकाल जानेवारीअखेर संपला. त्यामुळे बोंडे यांनी आपल्या पदाचा राजीनामा दिला.
तेजश्री यांनी जलसंपदामंत्री जयंत पाटील व श्रेष्ठी दिलीप वग्यानी, बबन थोटे, विराज शिंदे, रघुनाथ जाधव, संग्राम फडतरे, व्ही. डी. पाटील यांनी संधी दिल्याबद्दल आभार व्यक्त केले. शहरातील नागरिकांचे विविध प्रश्न मार्गी लावण्यासाठी प्रयत्न केले असून, भविष्यातही नागरिकांचे प्रश्न मार्गी लावणार आहे, असे त्यांनी सांगितले.
यावेळी पालिका अधिकारी आनंदा कांबळे, प्रतिभा पेटारे, वीर कुदळे, अनिल बोंडे, सारिका मदने ,सुदर्शन वाडकर उपस्थित होते.
फोटो: ०१०२२०२१-आयएसएलएम-आष्टा पालिका न्यूज
आष्टा पालिकेच्या उपनगराध्यक्षा तेजश्री बोंडे यांनी आपल्या पदाचा राजीनामा नगराध्यक्षा स्नेहा माळी यांच्याकडे सुपूर्द केला. यावेळी आनंदा कांबळे, प्रतिभा पेटारे, सारिका मदने, वीर कुदळे, अनिल बोंडे उपस्थित होते.