तासगाव : तासगाव तालुक्यातील ३९ ग्रामपंचायतींसाठी निवडणूक कार्यक्रम जाहीर झाल्यानंतर, गावपातळीवर इच्छुकांच्या मोर्चेबांधणीला आणि पॅनेलच्या जुळवाजुळवीला वेग आला आहे. बहुतांश गावांत भाजप आणि राष्ट्रवादीच्या कारभार्‍यांतच निवडणुकीचा सामना रंगणार आहे. सर्वच इच्छुकांचे लक्ष सरपंच पदाच्या आरक्षण सोडतीकडे लागून राहिले आहे.
तासगाव तालुक्यातील ३९ ग्रामपंचायतींचा कार्यकाल संपला आहे. या गावांसाठी आचारसंहिता लागू झाली असून १५ जानेवारीला मतदान होणार आहे. सरपंच पदाचे आरक्षण जाहीर झालेले नाही. इच्छुकांनी मोर्चेबांधणी सुरु केली असली तरी, आरक्षण कोणते पडणार, याकडे लक्ष लागून राहिले आहे. बहुतांश गावांत खासदार संजयकाका पाटील समर्थक गटाच्या विरोधात आमदार सुमनताई पाटील यांचाच गट आहे. ग्रामपंचायत निवडणुकीत अपवाद वगळता भाजप विरुध्द राष्ट्रवादीच्या कारभार्‍यांत पारंपरिक लढती होणार असल्याचे स्पष्ट आहे. गावातील कारभार्‍यांकडून पॅनेल तयार करण्यासाठी जुळवाजुळव सुरू केली असून वित्त आयोगातून सक्षम झालेल्या ग्रामपंचायतींची सूत्रे आपल्याकडेच राहण्यासाठी प्रयत्न सुरू केल्याचे दिसून येत आहे. कोरोनोचा व्हायरस कमी होत असतानाच, राजकारणाच्या व्हायरसने निवडणुका लागलेली गावे ढवळून निघत आहेत.
चौकट :
नोहेंबर महिन्यात मुदत संपणाऱ्या ग्रामपंचायती व सदस्यसंख्या...
आळते (९ सदस्य), बोरगाव (१३), दहीवडी (९), धामणी (७), ढवळी (११), धोंडेवाडी (७), धुळगाव (९), डोंगरसोनी (१३), डोर्ली (७), गव्हाण (११), गोटेवाडी (७), गौरगाव (९), हातनोली (९), हातनूर (१३), जरंडी (९), जुळेवाडी (९), कवठेएकंद (१७), कौलगे (७), लोढे (७), लोकरेवाडी (७), मांजर्डे (१५), मोराळे (पेड) (७), नागाव (नि.) (९), नरसेवाडी (७), निंबळक (९), पाडळी (७), पेड (१५), राजापूर (११), सावळज (१७), सिध्देवाडी (१३), शिरगाव (वि.) (९), तुरची (१५), वज्रचौंडे (७), विजयनगर (५), विसापूर (१५), वडगाव (९), वाघापूर (७), यमगरवाडी (७), येळावी (१७).