तासगाव : तासगाव-चिंचणी मार्गावरील द्राक्षबागेतील घोणस पकडत असताना या सापाच्या दंशाने येथील संजय माळी (वय ४८, रा. माळी गल्ली, तासगाव) या सर्पमित्राचा जागीच मृत्यू झाला. गुरुवारी सायंकाळी साडेचारच्या दरम्यान ही दुर्घटना घडली.
ट्रॅक्टरचालक म्हणून काम करणारे संजय माळी सर्पमित्र म्हणून अनेक वर्षांपासून काम करत होते. गुरुवारी सायंकाळी तासगाव-चिंचणी रोडवरील द्राक्षबागेत दोन घोणस असल्याचे दिसून आले. त्यामध्ये एक नर व दुसरी मादी होती. संबंधित शेतकऱ्याने तातडीने सर्पमित्र संजय माळी यांना फोन केला. नेहमीप्रमाणे माळी तातडीने द्राक्षबागेत पोहोचले. बागेत त्यांना नर व मादी असे दोन घोणस सर्प दिसले. सुरुवातीला त्यांनी आपले कसब पणाला लावत एक घोणस सर्प पकडला व त्यास पोत्यात घातले. नंतर दुसरा घोणस सर्प पकडण्याचा प्रयत्न सुरू केला. मात्र दुसरा घोणस पकडण्यात त्यांना यश येत नव्हते. बरेच प्रयत्न करूनही हा सर्प हाताला लागत नव्हता. दरम्यान, ही घोणस पकडण्याच्या नादात खवळलेल्या या घोणसने माळी यांच्या उजव्या हाताच्या बोटाला दंश केला. काही कळायच्या आतच घोणसने दंश केल्याने माळी यांच्या अंगाचा थरकाप उडाला. क्षणार्धात माळी बेशुद्ध पडले. त्यानंतर अवघ्या काही मिनिटांत त्यांची प्राणज्योत मालवली.
अचानक घडलेल्या या घटनेने खळबळ उडाली. घटनास्थळी बघ्यांची गर्दी झाली. बघता-बघता या घटनेची माहिती वाऱ्यासारखी शहरभर पसरली. या घटनेने तालुक्यात हळहळ व्यक्त होत आहे. घटनेची माहिती समजताच पोलिसांनी तातडीने घटनास्थळी धाव घेतली. घटनेचा पंचनामा करून पोलिसांनी माळी यांचा मृतदेह शवविच्छेदनासाठी पाठवला.
चौकट :
शेकडो सापांना जीवदान
माळी यांनी शेकडो साप, नागांना जीवदान दिले होते. कोणाचाही फोन आला की ते हातातील काम सोडून तेथे धाव घेऊन तात्काळ साप पडकून त्याला जीवदान देत होते. अशा सर्पमित्राचा मृत्यू झाल्याने माळी कुटुंबावर दुःखाचा डोंगर कोसळला आहे.