इस्लामपूर : सुपाऱ्या घेऊन आंदोलने करणाऱ्या महेश खराडे यांनी हिंमत असेल तर पोलिसांना सोबत न घेता कधीही सांगून सदाभाऊंच्या घरावर मोर्चा घेऊन यावा. त्याला रयत क्रांतीचे कार्यकर्ते चोख उत्तर देतील. खराडे यांनी आमच्या नादाला लागू नये, असा इशारा रयत क्रांती संघटनेचे राज्य प्रवक्ते लालासाहेब पाटील यांनी पत्रकार बैठकीत दिला.
ते म्हणाले, आमदार सदाभाऊ खोत यांची राज्यभरात असलेली प्रतिमा स्वाभिमानी शेतकरी संघटनेच्या डोळ्यात खुपत आहे. गेल्या तीन वर्षांपासून कडकनाथ प्रकरण पुढे करून त्यांना व कुटुंबाला बदनाम करण्याचे काम सुरू आहे. रवीकिरण माने समाजमाध्यमांमध्ये नेहमी व्यक्तिद्वेषातून खोटे आरोप करत आहे. त्याला समजाविण्यासाठी गेले होते. त्यावेळी त्यानेच अंगावर धावून येत आमच्या कार्यकर्त्याला जखमी केले. याबाबत आम्ही माने विरुद्ध पोलिसांत फिर्याद दिली आहे. या घटनेवेळी सागर खोत कोल्हापुरात होते. त्यांचा या घटनेशी संबंध नाही.
यावेळी बजरंग भोसले, किरण उथळे, राजेंद्र पाटील, लालासाहेब धुमाळ, अशोक लोहार, मोहसीन पटवेकर उपस्थित होते.