सांगली : लोकनेते (स्व.) राजारामबापू पाटील यांचा पुतळा सांगलीत उभारण्यासाठी महापालिकेतील राष्ट्रवादीने पुढाकार घेतला आहे. येत्या सोमवारी होणाऱ्या महासभेत प्रस्ताव आणण्याच्या हालचाली सुरू असून स्टेशन चौकात वसंतदादा स्मारकालगतच्या महापालिकेच्या जागेत हा पुतळा उभारण्यावर शिक्कामोर्तब केले जाणार आहे. त्याशिवाय इतर काही जागांचाही शोध घेण्याच्या सूचना महापौर दिग्विजय सूर्यवंशी यांनी दिल्या आहेत.
महापालिकेत राष्ट्रवादीचे प्रदेशाध्यक्ष जयंत पाटील यांच्या नेतृत्वाखाली दोनदा सत्ता आली; पण आजअखेर महापालिका क्षेत्रात राजारामबापूंचा पुतळा उभारला गेलेला नाही. भाजपच्या सत्ताकाळात राष्ट्रवादीने पुतळा उभारण्याचा प्रस्ताव दिला होता. पण त्यावर निर्णय होऊ शकला नाही. आता महापालिकेच्या सत्तेची सूत्रे राष्ट्रवादीकडे आहेत. त्यामुळे राजारामबापूंचा पुतळा उभारणीचे स्वप्न सत्यात आणण्याच्या हालचाली सुरू झाल्या आहेत. राष्ट्रवादीचे नगरसेवक शेडजी मोहिते यांनी याबाबत महासभेकडे प्रस्ताव दिला आहे.
येत्या १९ रोजी महासभा होत आहे. त्या सभेत राजारामबापूंचा पुतळा उभारणीवर शिक्कामोर्तब केले जाईल. सध्या स्टेशन चौकातील वसंतदादा स्मारकालगत महापालिकेच्या जुन्या जकात कार्यालयासमोर जागा उपलब्ध आहे. त्यातच स्टेशन चौकातील सिटीबस थांबाही बंद पडल्याने त्या जागेत पुतळा उभारण्याचा विचार सुरू आहे. पण या जागेवरून काँग्रेस व राष्ट्रवादीत वाद होण्याची शक्यता आहे. त्यामुळेच महापौर सूर्यवंशी यांनी स्टेशन चौकासह इतर जागांचाही शोध घेण्याची सूचना राष्ट्रवादीच्या नगरसेवकांना केली आहे.
चौकट
भूसंपादनासह परवाना शुल्कावर चर्चा
मिरज शहर विकास योजना नकाशानुसार नियोजित ख्वाजा कॉलनी वसाहत ते मिरज-कोल्हापूर महामार्गापर्यंत जागेतून जाणाऱ्या शंभर फुटी रस्त्याचे भूसंपादन करण्यास मान्यता देण्याचा विषय महासभेच्या अजेंड्यावर आहे. महाराष्ट्र अग्नि सुरक्षा अभियान अंतर्गत पदनिर्मितीस मान्यता तसेच हनुमाननगर ऑक्सिडेशन पॉईंट व माळबंगला ७० एमएलडी जलशुद्धिकरण केंद्र या दोन्ही जागांवर फायर स्टेशन, संजयनगर अभयनगर येथील महापालिकेच्या खुल्या जागेत नागरी प्राथमिक आरोग्य केंद्र क्रमांक ६ चे बांधकाम करण्यासाठी कामाची जागा बदलणे, महापालिका क्षेत्रातील विविध प्रकारचे व्यवसायधारकांचे दंड माफ करून व्यवसाय परवाना फी भरून घेण्यास मान्यता देण्याचा विषयही अजेंड्यावर आहे.