इस्लामपूर : वाळवा आणि शिराळा तालुक्यांतील जनतेच्या सोयीसाठी या दोन्ही आगारातून सांगलीपर्यंत जाणाऱ्या एसटी बसच्या फेऱ्या मिरजेपर्यंत कराव्यात, अशी सूचना जलसंपदा मंत्री जयंत पाटील यांनी एसटीच्या विभागीय नियंत्रकांना केली आहे.
या दोन्ही तालुक्यातील जनतेचा मिरजेशी सातत्याने संपर्क येत असतो. जिल्हाधिकारी कार्यालय, विश्रामबाग, पोलीस मुख्यालय, प्रशासकीय इमारत, शैक्षणिक महाविद्यालये, जिल्हा परिषद, जिल्हा क्रीडा संकुल अशा विविध ठिकाणी त्यांना जावे लागत असते. तसेच शासकीय रुग्णालय, मिरजेतील शासकीय रुग्णालय आणि मिशन रुग्णालय येथे वैद्यकीय कारणासाठी जाण्याची गरज भासते.
सांगलीतून मिरजकडे जाण्यासाठी खासगी प्रवासी वाहतूकदारांकडून मोठ्या प्रमाणात आर्थिक मागणी केली जाते. त्याचा भुर्दंड सर्वसामान्य जनतेला बसतो. अशा गंभीर स्वरुपाच्या आलेल्या तक्रारीची दखल घेत जयंत पाटील यांनी सांगलीपासून मिरजेपर्यंतच्या सर्व थांब्यांवर ही सेवा देण्याचे पत्र विभाग नियंत्रकांना दिले आहे.