सांगली : आटपाडी तालुक्यात विविध सहा ठिकाणी टाकण्यात आलेल्या दरोडा, घरफोडीच्या गुन्ह्यांचा छडा लावण्यात स्थानिक गुन्हे अन्वेषण शाखेच्या पथकाला यश आले. या प्रकरणी देवगण उर्फ देव्या बापू पवार (वय १९, रा. सरकारी दवाखान्यामागे, आटपाडी) यास ताब्यात घेण्यात आले असून त्याच्याकडून दोन लाख ८९ हजार ६८० रुपये किमतीची सोन्या-चांदीचे दागिने जप्त करण्यात आले आहेत.
जिल्ह्यातील चोरी, घरफोड्यांसह अन्य गुन्ह्यांत हवे असलेल्या गुन्हेगारांचा शोध घेऊन त्यांच्यावर कडक कारवाईचे आदेश पोलीस अधीक्षक दीक्षित गेडाम यांनी दिले आहेत. त्यानुसार एलसीबीचे पथक आटपाडी शहरात गस्तीवर होते. या वेळी शहरातील बायपास रस्त्यावर असलेल्या एका हॉटेलसमोर एक तरुण चोरीचे दागिने विक्रीसाठी येणार असल्याची माहिती मिळाली होती. त्यानुसार पथकाने देव्या पवारला ताब्यात घेतले असता, त्याच्याकडे दोन लाख ८९ हजार ६८० रुपयांचे दागिने मिळून आले.
याबाबत अधिक चौकशी केली असता, आटपाडी व दिघंची येथे बंद घरावर पाळत ठेवून रात्रीच्या वेळी कुलूप तोडून घरफोडी केल्याचे त्याने सांगितले. त्यानुसार दिघंची येथील आदिती ज्वेलर्स हे सराफी दुकान, आटपाडीतील आबानगर चौकातील वसंत विष्णू जाधव यांचे घर, आटपाडी न्यायालयासमोर असलेले मनीषा उत्तम सरगर यांचे घर, दिघंची येथील अरुणा अनिल वेदपाठक, विद्यानगर आटपाडी येथील शोभा मल्लाप्पा राचगोंड यांचे घर आणि आटपाडीतील भारत पांडुरंग ठेंगले यांचे घर फोडून ऐवज लांबविल्याचे तपासात स्पष्ट झाले.
आटपाडी पोलीस ठाण्यात या सर्व गुन्ह्यांची नाेंद असल्याने एलसीबीच्या पथकाने पुढील तपासासाठी त्यास आटपाडी पोलिसांच्या ताब्यात दिले.
संशयित पवारकडून मंगळसूत्र, सोन्याचे बदाम, अंगठ्या, चांदीचे छल्ले, सोन्याची चेन, देवाची मूर्ती आदी ऐवज जप्त करण्यात आला आहे.
एलसीबीचे निरीक्षक सर्जेराव गायकवाड यांच्या मार्गदर्शनाखाली उपनिरीक्षक दिलीप ढेरे, जितेंद्र जाधव, अनिल कोळेकर, सागर टिंगरे, संदीप गुरव आदींच्या पथकाने ही कारवाई केली.
चौकट
सोलापूर जिल्ह्यातही गुन्हे
या गुन्ह्यात अटकेत असलेल्या देवगण पवार व त्याच्या ७ साथीदारांनी सोलापूर जिल्ह्यातही गुन्हे केले आहेत. १९ जानेवारी रोजी पिलीव घाटात एसटी बस लुटण्याच्या उद्देशाने एसटीवर दगडफेक करण्यात आली होती. या गुन्ह्यात आटपाडीतून चोरलेल्या दुचाकीचा वापर करण्यात आला होता.