सांगली : सांगली शहर व जिल्हा युवक काँग्रेसतर्फे शहरातील पेट्रोल पंपावर इंधन दरवाढ व महागाईविरोधात स्वाक्षरी अभियान सुरू करण्यात आले. कृषी व सहकार राज्यमंत्री डॉ. विश्वजित कदम यांच्या उपस्थितीत या अभियानाची सुरुवात करण्यात आली. नागरिकांनी या अभियानास उत्स्फूर्त प्रतिसाद दिला.
यावेळी सांगली जिल्हा युवक काँग्रेसचे अध्यक्ष नगरसेवक मंगेश चव्हाण, शहर युवक काँग्रेसचे अध्यक्ष सुहेल बलबंड म्हणाले, मोदी सरकार सर्वसामान्य जनतेचे नसून उद्योगपतींचे सरकार आहे. कोरोना काळात या देशातील जनतेच्या हिताचे निर्णय घेण्याऐवजी वारंवार पेट्रोल, डिझेल व जीवनावश्यक वस्तूंची दरवाढ सुरू आहे. सरकारने लवकरात लवकर जनतेला परवडतील असे दर जाहीर करावे, अन्यथा युवक काँग्रेस तीव्र आंदोलन करेल.
यावेळी आमदार मोहनराव कदम, सांगली शहर-जिल्हा काँग्रेसचे अध्यक्ष पृथ्वीराज पाटील, युवा नेते विशाल पाटील, डॉ. जितेश कदम, सांगली जिल्हा युवक काँग्रेसचे प्रभारी जयदीप शिंदे, तौफीक मुल्लाणी, विद्यार्थी काँग्रेसचे जिल्हाध्यक्ष सौरभ पाटील यांच्यासह कार्यकर्ते उपस्थित होते.