मिरज : दुकाने व व्यापार बंदमुळे मिरजेतील प्रमुख बाजारपेठांत शुकशुकाट आहे. व्यापार बंदविरोधात मिरजेतील व्यापाऱ्यांनी लक्ष्मी मार्केट चाैकात निदर्शने केली. आ. सुरेश खाडे यांनीही आंदोलनाचा इशारा दिला आहे. गुरुवारी तिसऱ्यादिवशीही शहरात व ग्रामीण भागात दुकाने व व्यवहार बंद होते.
प्रशासनाकडून लाॅकडाऊनच्या कठोर अंमलबजावणीमुळे मिरज शहरातील हॉटेल व्यावसायिक, छोटे व्यापारी, फेरीवाले, हातगाडीवाले, भाजी विक्रेत्यांचा व्यवसाय बंद आहे. शहरात फळविक्रेते वगळता इतर खाद्यपदार्थ विक्री करणाऱ्या हातगाडीचालकांना प्रतिबंध केला असल्याने मार्केट परिसरातील रस्ते मोकळे आहेत.
आ. सुरेश खाडे यांनी दुकाने सुरू करण्यासाठी आंदोलनाचा इशारा दिला आहे. मात्र लाॅकडाऊनबाबत प्रशासनाचा कठोर पवित्रा असल्याने व्यापाऱ्यांवरील निर्बंध कायम आहेत. व्यापारी संघटनेनेही गुरुवारपर्यंत प्रशासनाने लॉकडाऊन न हटविल्यास निर्बंध झुगारुन व्यापारी दुकाने सुरू करण्याचा इशारा दिला होता. व्यापाऱ्यांनी लक्ष्मी मार्केट परिसरात निदर्शने करून व्यापार सुरू करण्याची मागणी केली.
राष्ट्रवादी नगरसेवकांनीही लाॅकडाऊनला विरोध केला आहे. मिरजेत अनेक दुकाने व हाॅटेलवर महापालिकेने दंडात्मक कारवाई सुरू केल्यानेही व्यापाऱ्यांसोबत वादावादीचे प्रकार सुरू आहेत.
शहरातील मार्केटसह किसान चौक, टाऊन हॉल, लक्ष्मी मार्केट परिसर, हिंदमाता चौक, लोणी बाजार रस्ता, दत्त चौक परिसरात खाद्यपदार्थ व अन्य वस्तू विक्रीच्या हातगाड्या, भाजी विक्रेत्यांना पिटाळण्यात आले आहे.
मिरजेसह ग्रामीण भागात मालगाव, आरग, बेडग, म्हैसाळ यासह पूर्व भागातील अनेक गावांतही लाॅकडाऊनमुळे व्यवहार बंद आहेत. वाईन व लिकर शॉप बंद असल्याने परमिट रूम व बारमध्ये दारू खरेदीसाठी तळीरामांची झुंबड आहे.
चाैकट
बाजार रस्त्यावर
लोणीबाजार परिसरात मात्र भाजीविक्रेते निर्बंध झुगारून रस्त्यावर ठाण मांडत असल्याने त्यांना हटविण्यासाठी महापालिका कर्मचाऱ्यांची धावपळ सुरू आहे.