लोकमत न्यूज नेटवर्क
कडेगाव : कडेगाव नगरपंचायतीच्या भ्रष्ट कारभाराची चौकशी करावी या मागणीसाठी पाणी संघर्ष समिती व राष्ट्रवादी काँग्रेसचे नेते डी. एस. देशमुख आणि वंचित आघाडीचे जीवन करकटे यांनी कडेगाव कडेगाव तहसीलदार कार्यालयावर चढून शोले स्टाइल आंदोलन केले. यावेळी आंदोलकांनी तहसील कार्यालयाच्या इमारतीवरून उडी घेण्याचा प्रयत्न केला. मात्र पोलिसांनी धाव घेत आंदोलकांना अडवले. यामुळे अनर्थ टळला.
कडेगाव नगरपंचायतीच्या माध्यमातून विकासकामात मोठ्या प्रमाणात भ्रष्टाचार होत आहे. शहरात हाय मास्ट लॅम्पचे काम एका कंपनीला दिले आहे. या कामाची सात वर्षांची जबाबदारी कंपनीची असूनदेखील हे लॅम्प बंद अवस्थेत आहेत. यावर कोणतीही कार्यवाही होत नाही. बालोद्यानमध्ये खेळणी बसविली आहेत. यात मोठा भ्रष्टाचार झाला आहे. या ठिकाणी सर्वत्र दुर्गंधीचे साम्राज्य आहे. अशाप्रकारे भोंगळ व भ्रष्ट कारभार कडेगाव नगरपंचायतमध्ये सुरू आहे. याची चौकशी करून दोषींवर कारवाईचे लेखी आश्वासन जोपर्यंत मिळणार नाही तोपर्यंत खाली उतरणार नाही, अशी भूमिका आंदाेलकांनी घेतली.
कडेगाव कार्यालयावरून उडी मारू असा पवित्रा आंदोलकांनी घेतला. त्यामुळे आंदोलनस्थळी एकच खळबळ उडाली. कोणताही अनर्थ घडू नये यासाठी तहसील कार्यालय परिसरात पोलीस बंदोबस्त तैनात करण्यात आला. नायब तहसीलदार जयवंत लाड, मुख्याधिकारी कपिल जगताप व पोलीस निरीक्षक पांडुरंग भोपळे यांनी चर्चा केली. त्यांनतर नायब तहसीलदार जयवंत लाड यांनी लेखी आश्वासन दिल्यानंतर आंदोलन स्थगित करण्यात आले. आता आंदोलकांच्या मागणीचे पुढे काय हाेणार, याकडे सर्वांचे लक्ष लागले आहे.
यावेळी श्रमिक मुक्ती दलाचे जेष्ठ नेते मोहनराव यादव, बाळासाहेब वत्रे, जगदीश महाडिक, वैभव देसाई, रमेश जाधव, संदेश जाधव, परवेज तांबोळी, विराज पवार, शिवसेनेचे राहुल चन्ने, संदीप काटकर, अनिल देसाई आदी उपस्थित होते.
चौकट :
दारूच्या बाटल्यांचा खच आणि खळबळ
आंदोलनावेळी तहसील कार्यालयावर देशी-विदेशी दारूच्या रिकाम्या बाटल्यांचा खच आढळून आला. आंदोलक कार्यकर्ते व पोलिसांच्या समक्ष हा प्रकार उघडकीस आला. या धक्कादायक प्रकाराने महसूल विभागासह तालुक्यात एकच खळबळ उडाली आहे. नायब तहसीलदार जे. एन. लाड यांनी येथील दारूच्या बाटल्या हटवण्याचा सूचना कर्मचाऱ्यांना दिल्या, तर तहसील कार्यालयावर देशी-विदेशी दारूच्या बाटल्या कुठून आल्या याबाबत उपस्थितासह तालुक्यातील नागरिकांतून तर्क-वितर्कांना उधाण आले हाेते.