कुपवाड : शहरातील मुख्य चौकात असलेल्या सर्व्हे नंबर २४९९ मधील जागेचा महापालिकेकडून करण्यात आलेला भाडेतत्त्वावर देण्याचा ठराव खंडित करण्यात यावा, अशी मागणी कुपवाड शहर शिवसेनेचे अध्यक्ष रूपेश मोकाशी यांनी आयुक्त नितीन कापडणीस यांच्याकडे केली आहे.
रूपेश मोकाशी म्हणाले की, कुपवाडमध्ये महानगरपालिकेतर्फे मनपा सि. स. नं. २४९९ मधील जागा भाडेपट्ट्याने देण्याचा ठराव क्र. १९८ दि.१३ मार्च २०२० रोजी झालेला आहे. तो पूर्णतः चुकीचा आहे. शहरातील मोक्याच्या ठिकाणी असणारी महापालिकेच्या मालकीची जागा भाडेतत्त्वावर देण्यापेक्षा समाजोपयोगी कारणासाठी वापरण्यात यावी. महापालिकेने केलेला ठराव क्रमांक १९८ मध्ये असे दिसून येते की, कुपवाड ग्रामपंचायत अस्तित्वात असताना परशराम विठोबा हंकारे यांना तीस बाय साठ फूट जागा तत्कालीन ग्रामपंचायत (कुपवाड) यांनी भाडेकराराने दिली होती. त्यामुळे ग्रामपंचायत बरखास्त होऊन नगरपालिका व त्यानंतर महानगरपालिकेत रूपांतर झाल्याने हा करार रद्दबातल ठरतो. वास्तविक तत्कालीन ग्रामपंचायतीने परशराम विठोबा हंकारे यांच्याशी भाडेकरार झाला असताना आजरोजी दुसऱ्या व्यक्ती म्हणजे रावसाहेब परशराम हंकारे आणि योगेश बबन हिंगमिरे यांच्या नावे ठराव मंजूर केल्याचे आढळते. ही जागा आजरोजी खुली असून, त्याठिकाणी कोणीही व्यवसाय करत नाही. तरी जागा भाडेतत्त्वावर देण्यापेक्षा हा प्रस्तावच रद्द करण्यात यावा. महापालिकेने ती ताब्यात घेऊन सार्वजनिक कामासाठी उपयोगात आणावी. सध्याच्या मंजूर ठरावास कुपवाड शहर शिवसेनेचा विरोध आहे.
यावेळी शिवसेना शहरप्रमुख रूपेश मोकाशी, संतोष पाटील, विठ्ठल संकपाळ, सुरेश साखळकर, प्रसाद रिसवडे यांच्यासह सर्व पदाधिकारी उपस्थित होते.